Wilder andam moaway bisan kinsa
CEBU, Philippines — Walay kurat nga namahayag si Deontay Wilder nga andam siyang moaway bisan ni kinsa human sa brutal niyang pagdepensa sa iyang World Boxing Council heavyweight title niadtong Domingo.
Hinuon, ang gihandum nga unification bout nilang Anthony Joshua lagmit dili pa mahitabo karong tuiga.
Niadtong Domingo didto sa Barclays Center sa Brooklyn, New York, gipakita ni Wilder kun unsa siya kabangis human iyang gipatikangkang si Dominic Breazeale sud lamang sa unang hugna.
Ang makabungog nga daog nagsirbato ni Wilder aron harungon si WBA, IBF ug WBO champion Joshua o dili ba makig-rematch ni Tyson Fury human sila magtabla niadtong Disyembre didto sa Los Angeles.
Si Wilder nga miinat sa wa'y pilde niyang record ngadto a 41-0-1 uban ang 40KOs, nagtuo nga mahitabo ra ang away nilang Joshua sa umaabot ug iyang giawhag ang iyang fans nga magpasensiya usa ning higayona.
Apan si Shelly Finkel, usa sa mga manedyer ni Wilder nagkanayon nga wa'y klaro nga mahitabo nga away batok ni Joshua o ni Fury sud ning tuiga.
Posibleng malinya sunod alang ni Wilder mao ang rematch uban ni Luis Ortiz. (BANAT NEWS)
- Latest
