Bucks miduol sa playoffs second round

CEBU, Philippines — Si Khris Middleton mikadlit og 20 puntos ug siyam ka rebounds sa dihang gipakaging na sab sa Milwaukee Bucks ang Detroit Pistons, 119-103, aron pagposte og 3-0 nga bintaha sa ilang NBA first-round playoff series kagahapong adlawa.

Mahimo nang motikang sa ikadunang hugna sa playoffs ang Bucks kon ugaling usban nila og parot ang Pistons didto sa Motor City karong Martes.

Si Brook Lopez mikolekta og 19 puntos, pito ka rebounds ug lima ka blocks, si Eric Bledsoe mipupo sab og 19 puntos, samtang si Giannis Antetokounmpo mikolekta og 14 puntos ug 10 ka rebounds sa ikatulo niyang sagunson nga double-double ning serye alang sa Bucks.

Human nakapalta og duha ka duwa gumikan kay nayayay ang tuhod, mipakitag aksiyon si Blake Griffin sa labing unang higayon sa serye. Mipuntos siya og27 apan dili kini igo aron paglikay sa Pistons nga masugamak sa ika-13 niining sunod-sunod nga pilde sa playoffs sukad niadtong 2008.

Didto sa Barclays Center sa New York, nagparamdam gilayon si Joel Embiid sa iyang pagbalik og duwa gikan sa injury human mikabkab og 31 puntos ug 16 ka rebounds aron pangulohan ang Philadelphia 76eers ngadto sa 112-108 nga kadaogan batok sa Brooklyn Nets.

Bisan pa man sa nahitabong insidente sa ikatulong kuwarter diin duha ka mga players ang na-ejected, ang Sixers misutoy ngadto sa 3-1 nga labaw sa serye ug puyde nang mo-abante sa ikaduhang hugna sa playoffs kon ugaling ilang tiwasan ang Nets didto sa ilang korte karong Miyerkules.

Si Embiid napitohan og flagrant atol sa miulbong kagubot sa oras nga 4:18 sa ikatulong kuwarter nga miresulta ngadto sa pagka-ejected nilang Jimmy Butler sa Philadelphia ug Jared Dudley sa Brooklyn.

Sa Western Conference, si Nikola Jokic miratsada og 29 puntos, 12 ka rebounds ug walo ka assists sa dihang gibaslan sa Denver Nuggets ang San Antonio Spurs, 117-103, aron pagtabla sa ilang serye, 2-2.

Ang Nuggets mipasud og 15 sa gitira nilang 31 ka tres aron putlon ang 14 ka sunod-sunod nilang pilde didto sa San Antonio sukad poa niadtong Marso 2012. Gawas ni Jokic, misalida sab si Jamal Murray uban ang 24 puntos.