CEBU, Philippines — Si Prince Vaugh Malana mitali og 20 puntos sa Sharks nga mitukob sa Lions, 77-59 aron pag-angkon og bahin sa liderato sa Sharks sa Elite Basketball Club Cebu Season 14 nga gipaluyohan sa Tough Gear Sportswear diha sa Visayan Glass gym sa Barangay Guadalupe, Dakbayan sa Sugbo.
Sila si RV Dolloso ug Ian Ortega nagkumbinar og 25 puntos alang sa Sharks nga nakapuwersa og four-way tie sa liderato uban ang Tigers, Eagles ug Cheetahs bitbit ang managsamang 4-2 nga baraha.
Human mirehistro og 21-12 nga labaw sa first half, padayon nga mirumbo ang Sharks sa Lions sa ikatulong kuwarter aron pagpalapad sa ilang bentaha ngadto na sa 17 puntos, 51-34. Si Randy Pogoy dunay 14 puntos alang sa Lions nga nakatilaw sa ikaupat nilang pilde sud sa unom ka duwa.
Sa lain pang mga aksiyon, si Edward Saberon mipupo og 25 puntos sa dihang ang Rams nakaipsot sa Cheetahs, 87-84, samtang si Prince Panes mikabkab og 24 puntos aron pangulohan ang Panthers ngadto sa 80-74 nga kadaogan batok sa Wolves.
Si Mark Lubiano mi-iskor og 17, samtang sila si Harmsway Molina ug Mark Matidios ngakumboya og 29 puntos alang sa Rams nga mitabla sa ilang record ngadto sa 3-3 sama sa Wolves ug Panthers.