Smart ahente sa multa
CEBU, Philippines — Gipahamtangan sa NBA si Boston Celtics guard Marcus Smart og $50,000 (P2.6 million) nga
multa gumikan sa pagtukmod niini ni Philadelphia 76ers center Joel Embiid ngadto sa sawog sa miaging nilang duwa.
Gumikan sa iyang gibuhat, si Smart napitohan og 'flagrant foul' ug awtomatik nga na-ejected sa oras nga 7:06 sa ikatulong kuwarter atol sa 118-115 nga kadaogan sa Sixers batok sa Celtics niadtong Huwebes.
Makita nga si Embiid misukarap sa korte, apan mitapos uban ang 37 puntos ug 22 ka rebounds alang sa 76ers.
Matud pa sa NBA nga ilang gisilotan si Smart gumikan sa agresibo niining paghamag ni Embiid sa tuyo nga mopasiugda og pisikal nga alterkasyon ug ingon man sa wala dayon niini pagbiya sa korte human siya na-ejected.
Ning higayona, midako ang multa ni Smart gumikan kay nagbalik-balik man ang dili maayo niyang binuhatan nga nagsugod sa wala pa ang regular season.
Niadtong Oktubre sa miaging tuig, gipabayad si Smart og $25,000 gumikan sa pagpasiugda niya og kagubot batok ni Cleveland Cavalier guard J.R. Smith atol sa usa ka pre-season game.
Duha ka bulan ang milabay, si Smart gipamulta og $35,000 human sa mainiton nilang panagbangi ni Atlanta Hawks forward DeAndre Bembry.
- Latest
