Warriors pabiling no. 1

CEBU, Philippines — Gipanit-panitan sa defending champion Golden State Warriors ang Indiana Pacers, 112-89 sa ilang duwa sa National Basketball Association kagahapon didto sa Oracle Arena sa Oakland, California.

Sikit ang panag-ilogay  sa unang dapit sa Western Conference tali sa Warriors ug Denver Nuggets nga midaog usab kagahapon batok sa Washington Wizards, 113-108 didto sa Capitol Arena sa Washington.

Ang Warriors mao gihapon ang  nag-una sa standing  uban ang 49-22, labaw lang og usa ka daog sa nagsunod niini nga Nuggets nga nagbitbit og 48-22 nga baraha.

Ang  superstar  sa Warriors nga si Kevin Durant maoy bida sa   kadaogan nga miiskor og   15 puntos, unom ka assists ug tulo ka blocks. Si Durant nakapakita gihapon og maayong labok  bisan pa og nagbangutan pa kini sa kamatayon sa iyang suod nga higala, kinsa gipatay  didto  sa  Atlanta.

Si Stephen Curry miiskor usab og 15 puntos diin 12 niini gikan sa upat niya ka tres.

Sa ilang bahin, ang Nuggets mirehistro sa ikalima nilang sunod-sunod nga daog. 

Si Nikola Jokic mikulit og 'double-double' nga 15 puntos ug 11 ka assists. Siya ang miguba sa depensa sa Wizards nga wala na'y tsansa nga makasud sa playoffs.

Sa ubang mga duwa, ang Atlanta Hawks nakaipsot batok sa Utah Jazz sa iskor nga 117-114, ang Detroit Pistons milubong sa Phoenix Suns,    118-98    ug    ang Minnesota Timberwolves mihangkab sa New Orleans Hornets, 113-106.