Kapin na sa 6,000 runners mosalmot sa SM2SM Run

CEBU, Philippines – Aduna na'y 6,400  ka entrante ang kompirmado nga modagan sa ikasiyam nga edisyon sa SM2SM Run nga mosikad karong Domingo didto sa SM City Cebu grounds.

Tungod niini, opisyal na nga nalabwan sa mga organizers ang numero sa mga partisipante nga 6,000 nga natala sa miaging tuig.

Ang lumba gilangkuban sa 21K, 12K, 8K ug 5K categories.

Sa kadaghan sa managan, ang mga organizers mituyo pagsayo sa lumba gikan sa alas-4 ngadto sa alas-3 aron dili kini  makamugna  og kasamok sa trapiko ug alang usab sa seguridad sa mga runners. Mipasalig  hinuon ang Cebu City Transportation Office nga motabang sa kahapsay sa lumba.

Usa sa mga rason sa kadaghan sa mga entrante mao ang kapin sa P600,000 nga  ganting salapi ug freebies nga ipanghatag alang sa mga mananaog. Aduna  sa'y specially-designed medal sa mga 21K ug 12K finishers.