Peñalosa nangahas birahon ang WBO title

CEBU, Philippines – Mibahad si undefeated Dave 'The Hunter' Peñalosa nga sakmiton ang bakanteng WBO Oriental featherweight title sa iyang pakigsangka sa Mehikanong si Marcos Cardenas karong gabii didto sa Skydome sa SM City North EDSA.

Si Peñalosa, anak ni kanhi two-division world champion Dodie Boy Peñalosa Jr., nagkanayon nga adunay gamay'ng presyur tungod  sa legasiya sa iyang pamilya sa boksing. Bisan pa niini, wala maibani iyang kompiyansa nga modaog.

Si Cardenas maoy giisip nga labing lisud nga hagit ni Peñalosa tungod  sa kasinatian niini.

Si Peñalosa walay pilde sa iyang 14 ka away diin 10 niini gikan sa knockout, apan biya siya sa kasinatian batok ni Cardenas, kinsa adunay record nga 19-6, 15KOs.

Sa supporting bouts, ang igsuon ni Dave nga si Carl Peñalosa makigharong usab sa Thai boxer Watana Phenbaan ubos sa super flyweight showdown.

Ang uyoan nila ni Dave ug Carl nga si legendary boxer Gerry Peñalosa nagkanayon nga gusto niya nga masuwayan iyang mga pag-umangkon aron makita kun andam ba kini nga mosunod sa ilang lakang nga mamahimong world champion.

Moaway usab sa susamang card ang kanhi IBF flyweight king nga si Johnriel Casimero nga mosaka sa bantamweight division aron sangkaon ang Hapon nga si Kenya Yamashita.