Irving nayayay, walay klaro kun kanus-a makabalik og duwa
CEBU, Philippines — Nayayay ang tuong tuhod ni Boston Celtics point guard Kyrie Irving ug wala pa'y klaro kun kanus-a kini makabalik og duwa.
Human siya gipaubos sa MRI (magnetic resonance imaging) kagahapon didto sa New England Baptist Hospital, nasuta sa mga doktor nga dili seryoso ang injury nga nahiaguman ni Irving sa nahibilin nga kuwatro minutos sa ikaduhang kuwarter atol sa ilang 123-112 nga kadaogan batok sa Los Angeles Clippers niadtong Domingo didto sa ilang korte.
Ang 26-anyos nga si Irving miiskor og 14 puntos sud sa 14 minutos niyang pagtikang sa korte.
Sa kinatibuk-an karong season, si Irving mi-average og 23.8 points, 7.0 assists ug 4.9 rebounds alang sa Celtics.
Taud-taud nang dunay deperensiya ang tuhod ni Irving. Niadtong Abril sa miaging tuig, gioperahan ang tuhod sa No. 1 overall pick hinungdan nga wala kini makapakita'g aksiyon sa nahibiling mga duwa sa Celtics sa regular season. (BANAT NEWS)
- Latest