Sinukmagay na!
CEBU, Philippines — Dunay panultihon nga ang kinabuhi sa tawo magsugod kun ikaw 40-anyos na.
Karon nga naabot na siya sa maong punto sa iyang kinabuhi, dunay angayan nga pamatud-an si Manny Pacquiao.
Mao kini ang pas-anon nga misyon ni Pacquiao (60-4-2, 39KOs) sa labing una niyang pagdepensa sa iyang WBA welterweight title batok ni Adrien Broner (33-3-1, 24KOs) karong udto (oras dinhi sa Pilipinas) didto sa MGM Grand Garden Arena sa Las Vegas, Nevada.
Sa labing una niyang away karon nga mipatong na siya sa edad nga 40, gustong ipakita ni Pacquiao sa kadaghanan nga ang edad numero lamang. Andam siyang tuyokon og balik ang orasan.
"Forty is just a number, it doesn't matter that I'm 40 years old -- I feel young," sumala pa sa bugtong eight-division world champion sa kasaysayan. "I have something to prove: that at 40 I can still be at my best... I want to prove that Manny Pacquiao is still there."
Masaligon si Pacquiao nga bisan sa iyang pangedaron, hait ug gamhanan gihapon siya nga boksidor nga angayan kahadlokan.
Gawas niini, kinahanglan sab nga modaog si Pacquiao batok ni Broner aron dili madiskaril ang giplano nilang 'rematch' ni Flloyd Mayweather Jr.
Dili hiuoon sayon nga tahas ang sagubangon ni Pacquiao gumikan kay mas batan-on ug dekalibre sab si Broner.
Nagkanayon si Broner nga iyang gitamod si Pacquiao isip usa ka banggiitan nga boksidor, apan iyang gibati nga panahon na sab niya karon panahon ug nagpanikad siya nga palayason ang Pinoy ring star sa trono niini.
"Pacquiao's a legend," matud pa ni Broner. "He'll always go down as one of the best in the boxing business. But I just feel like it's my time to take over this sport and I'm coming to take the throne from Pacquiao."
Gipakita nilang Pacquiao ug Broner ang ilang kaandam nga magkarambola ibabaw sa ring kay yano kaayo nilang gikuha ang timbang atol sa official weigh-in kagahapon. Si Pacquiao mitimbang og 146 ka libras, samtang si Broner 146.5 ka libras.
- Latest
