Romeo gidungog nga buhian sa TNT Katropa

CEBU, Philippines — Mikatag karon og maayo ang balita nga matud pa magbuwag na og dalan ang TNT KaTropa ug ang high-scoring point guard nga si Terrence Romeo.

Gidungog nga interesado ang TNT nga makig-trade sa Blackwater Elite aron makuha nila ang katungod nga mopili sa No. 2 rookie sa nagsingabot nga PBA Draft.

Ang umaabot nga draft gihulagway nga usa sa labing giatngan nga draft sa kasaysayan sa liga tungod kay daghan  kini og mga sikat nga aspiring rookies sama nila ni Ray Parks Jr., CJ Perez, Robert Bolick ug Abu Tratter.

Si Blackwater team owner Dioceldo Sy miingon nga wala pa sila kadawat sa pormal nga tanyag gikan sa TNT ug wala sab niya giklaro kun  andam ba sila nga mouyon sa trade. 

Giangkon  niya nga si Romeo usa ka PBA star nga angay ibutang sa iyang koponan.

Ang TNT ug Blackwater kanunay na nga mag-ilis og players. Nasayran nga niadtong tuig 2015, ang Blackwater mihatag sa ilang No. 1 pick sa TNT nga si Mo Tautuaa.