Dreamscape Pabiling way pilde sa E-Leagues
CEBU, Philippines — Si Ralph Belarmino miposte og 19 puntos ug 10 ka rebounds sa dihang gilampaso sa Dreamscape Networks Lions ang JP Morgan Chase Bankers, 73-53, aron pagpabiling way pilde sa Tanduay Athletics E-Leagues for Basketball Season 14 niadtong Sabado diha sa City Sports Club-Cebu gym.
Si Dom Santini Ortega miamot og 13 puntos ug lima ka rebounds, samtang si John Louie Arriesgado dunay 11 puntos, unom ka rebounds, duha ka steals ug duha ka rebounds sa Lions nga mipahugot sa ilang pagkupot sa solong liderato sa EVO League bitbit ang 8-0 nga baraha.
Sa laing mga duwa sa EVO League, ang Contact Solutions Flying Lemurs ug Kyocera Frontiers nakasustinir sab sa ilang kainit.
Si Jerard De la Cerna dunay 14 puntos ug siyam ka rebounds sa dihang gibuntog sa Flying Lemurs ang Optum Knights, 65-60, aron pag-inat sa ilang record ngadto sa 4-2, samtang si Matthew Grafilo mipabuhagay og 23 puntos, pito ka rebounds, pito ka assists ug upat ka steals sa dihang gimasaker sa Frontiers ang Streamline Kangaroos, 103-41, alang sa ikaunom nilang daog sa pito ka duwa.
Sa Elite Classic, ang Teleperformance Vipers nakaangkon og bahin sa liderato human gipaksit ang ePerformax Reds, 85-66.
Si Kevin Clark Navaja mitimbre og 20 puntos, si Gamaliel Bas mitunol og 12 puntos, 11 ka rebounds, lima ka steals, tulo ka assists ug duha ka blocks, samtang si Germaine Jo Michael Guarisma midonar og 10 puntos sa Vipers, nga nakigduyog karon sa Accenture Sharks sa kinatas-ang bahin sa liderato bitbit ang managsamang 8-1 nga baraha. (BANAT NEWS)
- Latest