Tayud mitikang sa midget finals sa Alegado cup

CEBU, Philippines — Si Robert Goc-ong mikadlit og 17 puntos ug si Aljo Ruiz midugang og 14 sa dihang gilabhan sa Tayud ang Pitogo, 81-68 aron pag-abante ngadto sa Midget Category A finals sa 8th Mayor Teresa 'Nene' P. Alegado Fiesta Basketball League didto sa  Consolacion.

Miamot si Phineas Niño Frias og 12 puntos alang sa Tayud nga milusad og  32-17 rally sa ikaduhang kuwarter aron pagbalitok sa 14-21 nilang alkansi ngadto sa 46-38 nga labaw sa halftime.

Nakasustinir ang Tayud sa ilang kainit dayon na ngadto sa paglubong og 13 puntos sa Pitogo nga nahagba gikan nakakuha og 45 puntos gikan nilang Justin Maglasang, John Fritz Bernido ug Narxyll Pepito.  Sangkaon  sa Tayud ang modaog sa laing semifinal match tali sa Danlag ug Pulpogan.

Ang Danlag nakaangkon pa og laing kinabuhi human gipakuratan ang No. 1 seed Pulpogan, 70-69.

Si Clark Jugan maoy nangu sa Danlag uban ang 24 puntos, samtang sila si Jonas Chu ug Mark Orongan mitali og 13 ug 11 puntos.

Sa SK Juniors Category A, si Rey Gonzaga miposte og 21 puntos ug sila si Kendrick Alcover ug John Ian Ouano nagkumbinar og 27 puntos  sa dihang gipakaging sa Casili ang Cabangahan, 83-65 aron pagsud sa semis bitbit ang  'twice-to-beat' advantage.