Mayweather moagi pa og tune-up

CEBU, Philippines – Kinahanglan pa nga magpaabot og taas nga panahon ang boxing fans sa dili pa nila masaksihan ang "rematch" tali nila ni Floyd Mayweather Jr. ug Manny Pacquiao.

Kini human ang undefeated boxing star nga si Mayweather miingon nga posibleng moagi una siya og usa ka tune-up fight una niya harungon pag-usab si Pacquiao ibabaw sa ring.

Wala direkta miingon si Mayweather nga mohimo siya og tune-up fight, apan namahayag siya nga aduna siya'y dakong kalihukan nga may kalambigitan sa boksing didto sa Tokyo, Japan.

Daghang boxing analysts nagtuo nga mohimo gyud og tune-up fight si Mayweather sa dili pa niya atubangon pag-usab ang iyang karibal. 

Si Mayweather katapusang miaway niadtong Agosto sa miaging tuig diin iyang gipaundang sa 10th round  si UFC star  Conor McGregor.

Samtang si Pacquiao   bag-o lang mihaw-as sa iyang 'knockout' nga kadaogan batok ni Argentinian Lucas Matthysse aron makuha ang WBA welterweight title niadtong  Hulyo ning tuiga.