Leonard nalabay sa Raptors

CEBU, Philippines — Ang dismayadong San Antonio forward nga si Kawhi Leonard adto  na manikaysikay sa Toronto Raptors nunot sa usa ka blockbuster NBA trade nga maghatod ni DeMar DeRozan ngadto sa Spurs. 

Mismo ang Raptors ug Spurs maoy mikompirmar niini kagahapon. Ang maong lakang nagtukmod nilang Leonard ug guard Danny Green ngadto sa Toronto hulip ni DeRozan, Austrian bigman Jakob Poeltl ug 2019 first-round NBA Draft pick.

Si Leonard nga garantisado modawat og $20 million sunod season uban sa Raptors, nakasilbe og siyam lamang ka duwa sa Spurs sa miaging season. Nakapalta siya sa nag-una nilang 27 ka duwa gumikan sa injury.

Si Leonard nga maoy NBA Finals MVP sa dihang nakampiyon ang Spurs niadtong 2014, mi-average og 16.3 points, 6.2 rebounds ug 2.3 assists sud sa pito ka tuig sa Spurs. Mipatik siya og career-best 25.5 points niadtong 2016-2017 season diin siya nakandidato pagka-MVP.

Sa iyang bahin, ang 28-anyos nga si DeRozan nakaduwa og siyam ka season sa Raptors diin siya mi-average og 27.3 puntos matag duwa niadtong 2016-2017 season. Sa kinatibuk-an sa iyang karera, mi-average siya og 19.7 points, 4.1 rebounds ug 3.1 assists matag duwa.