Monterroyo/Co-Jordan, friends mag-'rematch' sa LABA Cagefest 2018

CEBU, Philippines —  Sa ikaduhang sunod-sunod nga higayon, mag-abot na sab ang defending champion Friends ug ang Monterroyo/Co-Jordan alang sa ilang 'rematch' sa LABA Basketball Tournament 2018.

Miabante ang duha sa finals human gipilde ang tagsa-tagsa nilang karibal sa semifinals niadtong Lunes didto sa Co Tiao King gym sa Tabok, Mandaue City.

Ang Monterroyo/Co-Jordan mipilde sa AC Troopers, 50-45, samtang ang Friends yano kaayong mibira sa katapusang lingkoranan sa finals pinaagi sa paglubong sa Sebandal, 56-38.

Walay bisan usa ka Monterroyo/Co-Jordan player ang miiskor og double figures, apan ang balanse nilang ataki igo na kaayo sa pagpadaog kanila.

Maayo  sab  kaayo nga nakadala sa duwa  ang playmaker  nga si  Dr. Raul Monterroyo hinungdan nga nakapuntos ang 12  niya ka mga batos, kansang labok wala gyud molubad gikan sa pagsugod hangtod nahuman.

Sila si Michael Tañan ug Edgar Aligway parehong miiskor og siyete aron mangulo sa scoring sa Monterroyo/Co-Jordan nga nahulga human misikit ang AC Troopers, 38-36 sa fourth quarter. Apan nahupay ang gibating kakulba sa Monterroyo/Co-Jordan human masulod ang krusyal nga 3-point shot ni Richard Jordan, tres minutos kapin ang nahibiling oras sa duwa aron bingaton og balik ang ilang labaw.

Ang free throws nilang Aligway ug Marlon Mendoza sa daginutong oras sa duwa maoy nakadugang og kahayag sa kadaogan sa Monterroyo/Co-Jordan.

Si Rex Gonzaga mao sab ang nangulo sa AC Troopers nga mibagnos og 12 puntos diin walo niini iyang nahimo sa katapusang kuwarter.

Sa laing bahin, si Ramie Suson miposa og 11 puntos aron pangulohan ang Friends nga gipaluyohan ni Engr. Butch Migriño.

Bugnaw kaayo ang sugod sa Friends sa nag-unang duha ka kuwarter hinungdan nga nabiyaan sila og dos puntos sa halftime, 12-14. Apan nausab ang dagan sa duwa sa third period dihang mipauwan sila og mga puntos aron moposte og 45-22 nga bentaha paingon sa fourth quarter.

Sila si Cañas ug Albert Ramos nagkumboya'g 23 puntos aron mangulo sa napildeng Sebandal.

Ang liga nga gipaluyohan sa Bol-abon Eatery ubos sa superbisyon sa bag-ong  presidente  nga si S/Insp. Dondon Coloscos sa abag nilang Willy Medillo, Lloyd Chavez, Macmac Borga, Nante Rayla ug Rudy Candelada.

PUNTOS MATAG USA

Unang duwa:

Monterroyo/Co-Jordan (50) – Tañan 7,  E. Aligway 7, Mendoza 6, Jordan 5, Monterroyo 4, Ferolino 4, Catinoy 4,  J. Landiza 4, Pelit 3, Commendador 2, Atillo 2, Sugay 2.

AC Troopers (45) – Gonzaga 12, Cabrera 8, Borga 6, Englis 5, Coloscos 3, Ecot 3, Oquias 2, Lavador 2, Rayla 2, Cabahug 1,  Saldua 1.

Ikaduhang duwa:

Friends (56) – Suson 11, Mahusay 8, Bukiron 8, Castillo 4, Alquezar 4, Tantuan 4, Cabonilas 4, Federez 4, Herbieto 3, Son 2, Cabucos 2.

Sebandal (38) – Canas 13, Ramos 10, Bercero 6, Sebandal 4, Cabigas 4, Adulfo 2.