Ancajas inilog vs. Sultan, apan dili mokompiyansa
CEBU, Philippines – Si Jerwin Ancajas (27-1-1, 19KOs) maoy labing inilog batok sa kababayan niyang si Jonas Sultan (14-3, 9KOs) sa makasay-sayanon nilang away karong Domingo didto sa Save Mart Center sa Fresno, California.
Gani tungod sa halapad niyang kasinatian, pipila ka mga batid ang mitagna nga si Ancajas maoy modaog sa labing unang all-Filipino world title fight sud sa 93 ka tuig.
Apan si Ancajas dunay laing butang sud sa iyang huna-huna.
Bisan og siya andam na kaayong modepensa sa iyang IBF super flyweight belt, giklaro ni Ancajas nga dako siya og respeto ni Sultan ug dili mahitabo nga mokompiyansa siya batok sa dili sab kabintahaan niyang kaatbang
Si Ancajas dunay basihan sa pagbuhi sa maong pahimangno alang sa iyang kaugalingon.
Si Sultan nga pambato sa ALA Gym mao kanunay ang dehado sa dihang miaway siya batok ni two-division world champion Johnriel Casimero ug two-time world title challenger Sonny Boy Jaro sa miaging tuig, apan nakamaneho sa pagdaog.
Gipakamang ni Sultan si Jaro sa ikawalong hugna, ug dayon mipilde ni Casimero pinaagi sa desisyon sa ilang IBF eliminator nga maoy naghatag kaniya og katungod nga mohagit ni Ancajas.
- Latest