Westbrook multa $10,000

CEBU, Philippines – Gipahamtangan sa NBA og $10,000 nga multa ug ingon man technical foul ang bitoon sa Oklahoma City Thunder nga si  Russell Westbrook gumikan sa pagkomprontasi niini ni Rudy Gobert sa Utah Jazz.

Sa opisyal nga pamahayag ni NBA basketball operations executive Kiki VanDeWeghe, si Westbrook gisilotan human sa nahitabong insidente atol sa fourth quarter  sa  init nilang duwa batok sa Jazz niadtong Martes.

Ang Jazz maoy midaog, 113-96 aron pagposte og 3-1 nga bentaha sa ilang ‘best-of-seven’ Western Conference first round playoff series.

Si Westbrook giimbestigar sa liga gumikan  kay  daw    ilegal    kining  misud sa korte  gikan  sa substitutes bench aron komprontahon si Gobert human sila nagkasungi ni Raymond Felton.

Sa iyang bahin, si Westbrook nagkanayon nga nagtuo siya nga puwede na siyang makasud sa korte niadtong tungora ug gani nakadungog pa siya og sirbato nga nagtugot kaniya nga mobarog gikan sa ilang bench. Apan wala paminawa ang rason ni Westbrook sa NBA kay  klaro kaayong nakahimo siya og kalapasan sa lagda nga estrikto kaayong gipatuman sa liga.