Talisay Landing beach volley banatan karon

CEBU, Philippines — Magtakus sa ilang abilidad ang mga bitoon sa beach volley dinhi sa  Sugbo gumikan kay ang 2018 Talisay Landing Beach Volleyball Tournament banatan na sugod karong adlawa diha sa Aznar Beach Resort sa Barangay Poblacion, dakbayan sa Talisay.

Magsugod ang aksiyon sa women’s division sa alas-8 sa buntag, samtang ang kumbati sa men’s class mosikad sa ala-1 sa hapon. Ang semis ug finals gikatakda nga duwaon ugmang adlawa.

Mag-ilog alang sa korona sa women’s division mao sila si Paula Maninang, Klymince Orellanida ug Lynlyn Terado sa University of San  Jose-Recoletos   (USJ-R), Therese Rae Ramas ug Floremel Rodriguez sa Team Bitz, Muriel Keziah S. Opoc, May Ann Perino, ug Jahmaica P. Sabellano sa University of Cebu, Jan Marie Grace Gayo ug Charisse Sungahid sa University of Southern Philippines Foundation (USPF) ug Francess Macasero ug Wellamae Ortega sa Team Bogs.

Sila si kanhi national team member Jade Becaldo, John Kevin Juban ug Raphy Abanto nga nagrepresenta sa University of the Visayas (UV) maoy inilog sa men’s category.

Gipaabot nga mohatag kanila og  lisud nga hagit sila si Clint Recto, Joshua Rhey P. Sillos ug Ephraim John Pastor sa UC; JaiJai Verbosidad ug Niño Gairanod sa USJ-R; Menchel Remulta, Ryan Naranjo ug John Tormis sa USPF ug Roy A. Ulan ug Jewel Cabahug sa Team Sykes Asia.

Gawas nga sab-itan og medalya, ang makampiyon modawat og P5,000 matag usa, samtang ang malandig sa ikaduha hangtod sa ikaupat nga dapit mobulsa og P4,000, P3,000, P2,000 ug P1,000.