Sunsport dunay dugang dalit sa ilang campers
CEBU, Philippines — Subay sa selebrasyon sa ilang Silver anniversary, ang mga partisipante sa Sunsport Basketball Training Camp karong tuiga makadawat og dugang dalit.
Aron ilang mabati nga espesyal sila nga kabahin ning makasaysayanong tuig, si Sunsport manager Andrew C. Choachuy nagkanayon nga ang tanang campers sa ika-25 nilang season makadawat og commemorative mini basketballs nga espesyal nilang gidisenyo.
Kini gawas sa 2018 Sunsport basketball, training jersey, shoe bag ug shirt nga ilang makuha gikan sa P1,500 nilang registration fee.
Sigun sa gipahibawo sa sayo pa, ang Sunsport mogamit og duha ka binyu sa tinuig niining summer clinic nga magsugod karong Abril 2.
Gawas sa Sacred Heart Sports Center Sports Club, gamiton sab sa Sunsport ang Capitol Parish gym isip training ground sa mga batan-ong basketbolista nga nagtinguha nga bairon og maayo ang ilang abilidad.
Dunay duha ka hunat sa training nga molanat og duha ka oras ang ipahigayon gikan sa Lunes hangtud sa Biyernes:alas-8 hangtud sa alas-10 sa buntag alang sa mga nag-edad og siyete hangtud sa 11 anyos ug alas-10 hangtud sa alas-12 sa udto alang sa 12-19 age group.
Ang enrollment gikatakda karong Marso 26-31, alas-9 hangtud sa alas-4 sa hapon, diha sa Sacred Heart Center Sports Club.
Alang sa dugang impormasyon, mahimong mokontak sa buhatan sa Sunsport (345-1015, 0922-8377712) o ni training camp director Jojo Romarate (0923-8697421). (BANAT NEWS)
- Latest