Cavs ‘pilde dayon human sa All-Star

CEBU, Philippines — Milagapak ang Cleveland Cavaliers sa ilang pagbalik gikan sa NBA All-Star break human sila gibihag sa Washington Wizards, 110-103 bisan si LeBron James mipabuhagay og 32 puntos kagahapon didto sa Quicken Loans Arena sa Cleveland, Ohio.

Mao kadto ang labing unang pilde sa Cavs sud sa lima ka duwa sukad gi-trade ang unom nila ka players niadtong Pebrero 8.

Si James nga bag-o  lang midaog  sa ikatulo  niyang All-Star MVP award, mipasud og 13 sa 18 niya ka itsa ug mitapos uban ang siyam ka rebounds ug walo ka assists. Bisan pa man niini, nahagba gihapon sila sa mga kamot sa Wizards.

Nindot unta ang  opensa sa Cavs sa sinugdanan diin sila naglabaw og 12 puntos sa ikaduhang kuwarter.

Apan mainiton nga miresbak ang Wizards hinungdan nga ilang naapsan ang Cavs sa pinuntosay human sa tulo ka kuwarter, 82-79.

Katapusan  nga  miabante ang Cavs sa iskor nga 89-88 human sa tres  ni Kyle Korver sa nahibiling 9:42 sa duwa gumikan kay ang Wizards mibugwak og siyam ka sunod-sunod nga puntos aron paglabaw niini og balik sa hingpit.

Si Bradley Beal dunay 18 puntos, samtang si Tomas Satoransky midugang og 17 puntos ug walo ka assists alang sa Wizards nga midaog bisan og wala gihapon kaduwa ang injured nilang guwardiya nga si John Wall.

Gilawgaw sab sa Wizards ang home debut sa bag-ong mga batos sa Cavs nga sila si George Hill, Rodney Hood, Larry Nance Jr. ug Fil-Am Jordan Clarkson.

Didto sa Chicago, ang Philadelphia 76ers nakaipsot batok sa Bulls, 116-115 ubos sa pagpangu ni Australian rookie Ben Simmons nga mibahog og 32 puntos, apil na niini ang duha ka krusyal nga free throws sa nahibiling 5.6 segundos sa duwa.

Si Simmons mipasa sab og 11 ka assists ug milangkat og pito ka rebounds, samtang si Joel Embiid dunay 30 puntos ug 13 ka rebounds alang sa 76ers nga mipakgang sa upat ka sagunson nilang pilde sa balwarte sa ilang kontra.