Kasikan sa NBA
Rockets napiangan
Ang sinaligang forward sa Houston Rockets nga si Nene dili na makaduwa pa sa nahabiling bahin sa playoff season gumikan sa nahiaguman niining gisi sa unod sa iyang paa.
Ang 34-anyos nga Brazilian naangol duha ka minutos pa lamang ang nakaon atol sa Game-4 sa ilang West semis batok sa San Antonio Spurs niadtong Lunes. Si Nene dunay average nga 10.8 points ug 5.3 rebounds sa playoffs ug ang iyang pagka-injured gilantaw nga makaapekto og daku sa Rockets nga makigtakus batok sa Spurs sa Game-5 karong adlawa. Kasamtangang tabla ang ilang serye, 2-2.
Lowry mobiya sa raptors
Ang bitoon sa Toronto Raptors nga si Kyle Lowry nagtinguha nga dili na mogamit pa sa katapusang tuig nga nalatid sa iyang kontrata aron gukdon ang iyang ambisyon nga makadaog og NBA title.
Si Lowry nga usa ka three-time All-Star, duna pa’y usa ka tuig nga nahabilin sa upat ka tuig niyang kontrata sa Raptors nga mibalor og $48 million.
Apan daw sa wala na’y interes niini si Lowry human kini mipadayag nga gusto siyang mosud sa free agency karong summer sa tinguha nga makakita siya og team nga dunay kalibre nga mamahimong kampiyon.
“A ring. Nothing else. I just want a ring,” matud pa sa 31-anyos nga si Lowry. (BANAT NEWS)
- Latest