Cavs napukan sa Mavs

CEBU, Philippines - Mihimo og talagsaong kadaugan ang Dallas Mavericks dihang ilang gipilde ang defending champion Cleveland Cavaliers, 104-97 sa NBA kagahapon  didto sa American Airlines Center sa Dallas, Texas.

Gawas nga wala makaduwa si Kevin Love nga nayayay ang likod, dili sab nindot salida sa laing duha ka superstars sa Cavs nga sila si LeBron James ug Kyrie Irving. Si James mitapos lamang og 23 puntos human siyam lamang ang  iyang napasud sa 19 niya ka itsa, samtang si Irving dunay 18 puntos ug lima ka assists, apan nakamugna og unom ka turnovers.

Dominado sa Mavs ang duwa diin usa ka higayon naglabaw sila og 15 puntos, 100-85  sa tres ni Yogi  Ferrell sa nahabilin nga 4:18 sa duwa. Si Ferrell mihipos og 19 puntos.

Si Dallas forward Harrison Barnes miratsada og 24 puntos ug 11 ka rebounds, si Wesley Matthews miiskor og 21 puntos, samtang ang manghod ni Stephen Curry nga si Seth dunay 16 puntos alang sa Mavericks.

Ang Cavaliers natagak ngadto sa 32-15, apan naghari gihapon sila sa Eastern Conference.

Sa laing duwa, si Isaiah Thomas miiskor og 24 sa iyang 41 puntos sa katapusang kuwarter aron  hatagan ang Boston Celtics og 113-109 nga daog batok sa Detroit Pistons.

Ang Celtics miinat sa ilang baraha ngadto sa 30-18.

Samtang ang Philadelphia 76ers, bisan og wala moduwa ang topscorer ug rebounder nilang si Joel Embiid milatigo sa Sacramento Kings, salamat sa 23 puntos ug 10 ka rebounds gikan ni Robert Covington ug sa 17 puntos ni Dario Saric.

Si DeMarcus Cousins mipatuasik og 46 puntos, 15 ka rebounds ug lima ka assists sa Kings nga wala kaugpo bisan og milabaw kini og 16 puntos sa ikaduhang kuwarter.

Sa laing bahin, ang mangtas nga dunk ni James Johnson maoy nagtuldok sa 104-96 nga kalampusan sa Miami Heat batok sa Brooklyn Nets.

Si Johnson mikadlit og 17 puntos, samtang  sila si Goran Dragic ug Dion Waiters nagkumboya’g 39 puntos ug 17 ka assists sa Heat. (BANAT NEWS)