Career-high ni Kawhi

CEBU, Philippines - Si Kawhi Leonard mipatuasik og career-high 41 puntos, samtang si LaMarcus Aldridge midugang og 16 puntos ug 12 ka rebounds sa dihang gipatikyaob sa San Antonio Spurs ang Cleveland Cavaliers sud sa overtime, 118-115, sa NBA kagahapong adlawa didto sa Quicken Loans Arena sa Cleveland, Ohio.

Nakab-ot sa Spurs ang maong kadaogan bisan og wala makaduwa ang duha ka bitoon nilang si Tony Parker ug Pau Gasol, salamat sa nagbagang opensa ni Leonard.

Si Leonard mikadlit og sayes puntos sa overtime, apil na niini ang dunk sa nahibilin nga 4.9 segundos nga maoy nagselyado sa  ika-18 nilang daog sa 22 ka road games. Dako sab og naabag sa ilang kawsa si David Lee nga mihipos og 14 puntos.

Sila si LeBron James ug Kyrie Irving parehong mitali og 29 puntos sa Cavaliers, nga mao ang dunay katapusang itsa sa regulasyon ug daghan og oportunidad sa dugang singko minutos sa duwa. Duna pa gihapon unta sila'y tsansa nga makapuwersa og ikaduhang overtime apan mikagar ang gitirang tres ni Kevin Love.

Sa laing mga aksiyon, si Dwayne Wade mikadlit og 30 puntos ug si Jimmy Butler midugang og 23 alang sa Chicago Bulls, nga nakasugakod sa 42 puntos ni Demarcus Cousins dayon na ngadto sa pagpukan sa Sacramento Kings, 102-99, samtang si Damian Lillard mikumpleto sa iyang three-point play sa overtime ug mitapos og 28 puntos aron pag-aswat sa Portland Trail Blazers ngadto sa 127-123 nga kadaogan batok sa Boston Celtics.

Wala sab magpabitin si Sam Dekker nga mipabuhagay og career-high 30 puntos ingon man si James Harden nga miyagyag og 29 puntos ug 10 ka rebounds sa dihang gimakmak sa Houston Rockets ang Memphis Grizzlies, 119-95, samtang  si Nikola Jokic mitali og 19 puntos aron pagpangu sa Denver Nuggets batok sa LA Clippers, 123-98.

Sa uban pang mga resulta, ang Phoenix Suns mipaluhod sa New York Knicks, 107-105; ang Miami Heat mipatigbabaw batok sa Milwaukee Bucks, 109-97; ang Utah Jazz mibuntog sa Indiana Pacers, 109-100; ug ang Detroit Pistons mi-eskapo ngadto sa kulbahinam nga 113-112 nga daog batok sa Washington Wizards. (BANAT NEWS)