CEBU, Philippines - Human mapakyas sa makaduha ka higayon, si Milan ‘El Metodico’ Melindo (34-2, 12KOs) sa ALA Boxing Gym sayod nga bug-at nga misyon ang iyang pas-anon sa iyang pakigsangka ni Thai Fahlan Sakkreerin, Jr. (31-4, 16KOs) alang sa interim IBF light flyweight title sa main event sa “Pinoy Pride 39: Road to Redemption” karong Sabado sa gabii diha sa Cebu Coliseum.
Sa una niyang world title fight, ang garbo sa dakbayan sa Cagayan de Oro napakyas human mapilde pinaagi sa desisyon sa Mehikanong bitoon nga si Juan Francisco Estrada sa ilang WBA/WBO flyweight championship niadtong Hulyo 27, 2013 didto sa Cotai Arena sa The Venetian Macau.
Ang 28-anyos nga si Melindo nasugamak sa ikaduhang higayon pinaagi sa kontrobersiyal nga technical decision batok ni Javier Mendoza niadtong Mayo 30 sa miaging tuig didto sa Campo Nuevo Ensenada sa Baja California, Mexico.
Apan ang maong mga panghitabo gilubong na sa kalimot ni Melindo.
Karon nga duna na sa’y bulawanong oportunidad nga nanuktok sa iyang pultahan, si Melindo malaumon nga magmalampuson na siya ning higayona.
Gani naglantaw siya sa bag-ong hagit nga nagpaabot kaniya sa unahan uban sa tumang kadasig. Timaan niini mao ang pag-post niya og mga mahinungdanong mensahe sa iyang Facebook sa miaging adlaw diin ang usa niini maora’g naglabtik sa iyang mga kritiko.
“To those who think I can’t make it, I’d like to thank you for giving me a different kind of motivation. The negative comments I receive motivates me to do more what I've been doing so I could finally be taken seriously as a fighter,” padayag ni Melindo.
Sayod hinuon si Melindo sa kinatumyang bahin sa iyang dughan kun unsay labing maayong motibasyon nga iyang bitbiton sa iyang pagharong ni Sakkreerin. Kini mao ang sayo niyang pagretiro nga lagmit maoy mahitabo kun ugaling mapilde siya sa mga kamot sa bisitang Thai boxer.
Sa maong posibilidad nga napatik sa iyang huna-huna, si Melindo mipasalig nga buhaton tanan kutob sa iyang mahimo aron kapahimuslan ang gitawag niyang katapusan niyang tsansa aron pamatud-an nga bisan pa man sa tanang kalisdanan nga iyang naagian duna pa siya’y kapasidad nga mamahimong usa ka world champion. (BANAT NEWS)