Arcilla, 2 ka Sugbuanon abante sa semis

CEBU, Philippines - Ang topseed sa torneyo nga si Johnny Arcilla yano kaayong mitikang ngadto sa semifinal round uban ang laing duha ka pambato sa Sugbo nga sila si Israel Abarquez ug Hannah Grace Espinosa sa Cebu leg sa1st Peugeot Philippine Tennis Open kagahapon didto sa Cebu Country Club.

Si Arcilla, kansang amahan usa ka Sugbuanon, wala kaayo paningta sa paglampurnas niya nilang Marc Nicole Suson ug Calvin Canlas sa managsamang iskor nga 6-1, 6-1 aron pagpahayag sa giatngan nga kampiyonato tali niya ug ni No. 2 seed Francis Casey ‘Niño’ Alcantara.

Miabante sab si Alcantara human gitagak ang usa sa labing lig-on nga Sugbuanong entrante nga si  Jan Godfrey  ‘Noy’  Seno,  6-1, 6-4.

Si Seno nakatunob sa quarterfinal round human gilat-an si Luke Alquin Flores sa Ateneo de Manila University, 6-1, 6-1, apan nahagba siya sa mga kamot sa mas lig-on nga si Alcantara, usa sa labing tang-an nga players sa nasud karon.

Si Alcantara makigharong sunod batok sa laing garbo sa Sugbo nga si Israel ‘RJ’ Abarquez, kinsa nakaangkon og luna sa semis human gipatikalbong si Claudio Canlas sa Manila, 6-0, 6-2.

Sa iyang bahin, si Arcilla nagtinguha nga makalabni og luna sa final sa iyang pakighamag ni Marcen Angelo Gonzales sa Ateneo, nga nalandig sab sa Final 4 human gipalagpot ang Sugbuanong si Marc Norman Enriquez, 6-4, 6-4.

Sa women’s division, gisundan ni Espinosa ang impresibo niyang 6-1, 6-0 nga daog batok ni Jana Hernandez sa Manila pinaagi sa pagpakaging sa Bol-anong si Floreza Alesna, 6-1, 6-1 aron paglayat ngadto sa semis.  Wala hinuo’y suwerte ang tagilungsod niyang si Jana Marie Pages, nga gibuntog ni Kendies Thea Malinis, 0-6, 4-6. (BANAT NEWS)