Spurs mitabla sa best record

CEBU, Philippines - Natabla sa San Antonio Spurs ang labing maayo nga sugod sa kasaysayan sa ilang prangkisa human nila gilubong ang Brooklyn Nets, 106-79 sa duwa nila sa NBA kagahapon didto Barclays Center sa New York.

Ang Spurs mipalambo sa ilang baraha ngadto sa 33-6 ug natabla nila ang labing maayo nilang 39-game start sa ilang franchise nga ilang nahimo  niadtong 2010-2011 season ug dugang pa niana, miposte na sila’g 14 ka daog nga labing menos og  20 puntos. Nainat sab ang ilang sunod-sunod nga daog ngadto sa walo ka duwa.

Si LaMarcus Aldridge mirehistro og 25 puntos uban sa iyang 11 ka rebounds aron pangulohan ang opensa sa Spurs. Aduna siya’y 12-for-17  sa field shooting nga maoy iyang ika-12 niyang double-double karon nga season. Siya sab maoy leading scorer sa Spurs sulod na sa 11 ka duwa.

Ang forward nga si Kawhi Leonard midugang og 17 puntos, samtang ang rookie center nga si Boban Marjanovic miamot og 13 puntos alang sa Spurs kinsa midaog lang gihapon og daku bisan pa og pipila lang ka puntos ang nahimo nilang All-Star guard Tony Parker ug center Tim Duncan. 

Si Parker mihimo lang og sayes puntos, samtang si Duncan adunay otso puntos.

Misipyat ang Brooklyn og napulo sa ilang 12 ka tirada gikan sa three-point  ug gihamok og 19 ka turnovers nga naghatag sa Spurs og 30 turnover points.  

Ang sentro sa Nets nga si Brook Lopez maoy nangu sa iyang team sa iyang 18 puntos ug ang forward nga si Joe Johnson midugang og 16 puntos alang sa Nets, kinsa napilde na og 10 ka sunod-sunod nga higayon didto sa ilang homecourt. 

Ang Spurs naglabaw, 77-56 human sa third quarter, apan ang Nets   mihimo’g unom ka sunod-sunod nga puntos didto sa fourth quarter aron makan-an ang labaw, 62-77. Sa katapusang dos minutos  kalit nga giinat sa Spurs ang ilang labaw   ngadto sa 25 puntos, 87-62.

Sa lain pang mga duwa,  ang Golden State Warriors midaog batok sa Miami Heat, 111-103 didto sa Oracle Arena.

Gilubong sab sa Washington Wizards ang Chicago Bulls 114-100 didto sa United Center.

Wala gihapon makaduwa  silang Bradley Beal ug Marcin Gortat alang sa Wizards. 

Ang point guard nga si John Wall maoy nangu sa Wizards sa iyang 17 puntos, 10 ka assists ug tulo ka steals, samtang silang Garrett Temple, Otto Porter ug   Hilario Nene pulos miamot og 14 puntos alang sa maong kadaugan. 

Si Derrick Rose maoy nangu sa Bulls sa iyang 23 puntos, samtang si Jimmy Butler miamot og 19 puntos  ug si Pau Gasol adunay 15 puntos ug 10 ka rebounds. (BANAT NEWS)