CEBU, Philippines – Ang Sugbuanon nga si Johnny Arcilla miiskor og ‘double victory’ atol sa Palawan Pawnshop-Dagitab Festival Open Tennis Tournament kagahapon didto sa Naga Tennis Club.
Si Arcilla midaog sa ikatulong sunod-sunod niyang titulo human niya gipukan si Onyok Anasta, 6-4, 6-5.
Unang milabaw si Anasta sa first set, apan mipatigbabaw ang mga tira ni Arcilla aron maangkon ang labaw. Naguba usab ang konsentrasyon ni Anasta nga gipahimuslan sa nauwahi.
Bisan pa og nagsakit iyang kamot, si Arcilla mibanat sa second set diin siya milabaw sa wala pa migukod si Anasta, 5-4.
Hinuon mihimo og tulo ka sunod-sunod nga puntos si Arcilla sa tie-break aron makuha ang daog.
Gawas sa singles title, si Arcilla ug si Ronard Joven miangkon sa doubles title batok nila ni Anasta ug Patrick Tierro, 7-6, 6-1.
Sa wala pa ning torneyo, si Arcilla una nang midaog og kampiyonato sa Tuna Festival ug Pintaflores tennis tournament. (BANAT NEWS)