CEBU, Philippines – Ang beteranong forward sa Barako Bull nga si Willy Wilson misidlak nga labing hayag sa tanang players nga mipakita og maayong labok sa miaging semana.
Bisan mas mubo og kapin sa unom ka pulgada sa kombinasyon nilang Moala Tautuaa ug Troy Rosario sa Talk ‘N Txt, gipakuratan ni Wilson ang kadaghanan human siya mitali og career-high 28 puntos uban ang 20 ka rebounds aron pagtuboy sa Barako ngadto sa 105-98 nga kadaugan sud sa overtime batok sa Tropang Texters niadtong Huwebes.
Ang No. 4 pick sa Alaska Aces niadtong 2004 PBA Draft migamit sa halapad niyang kasinatian aron pagtabang sa Barako Bull nga makalabni og luna sa playoff bitbit ang 4-4 nga baraha.
Gumikan sa gipakita niyang katakus, si Wilson maoy gibayaw nga Accel-PBA Press Corps Player of the Week. Iyang gipangpilde sa maong pasidungog ang duha ka Sugbuanong higante nga sila si JuneMar Fajardo sa San Miguel Beer ug Greg Slaughter sa Ginebra ug ingon man si star playmaker Mark Barroca.
Ang Barako Bull naglaraw nga mokulit sa ikalima nilang daog sa Philippine Cup karong Biyernes diin ilang sangkaon ang Blackwater didto sa Smart Araneta Coliseum. (BANAT NEWS)