Bulls daog na SAB

CEBU, Philippines - Naghupot na karon og 2-0 nga baraha ang Chicaco Bulls ug ang Detroit Pistons aron mag-una sa Eastern Conference human sa ilang managlahing kadaugan sa NBA kagahapon nga giduwa sa duha ka managlahing binyu.

Ang Bulls midaog batok sa host Brooklyn Nets sa iskor nga 115-100, samtang ang Piston midaog  didto sa ilang balwarte batok sa Utah Jazz, 92-87.

Si Jimmy Butler mibahog og 24 puntos aron pangulohan ang Bulls, samtang si Brook Lopez mao sab ang nangu sa Nets sa iyang 26 puntos.

Sa laing duwa, gidepensaan sa Oklahoma City Thunder ang ilang homecourt dihang ila  gibiktima ang San Antonio Spurs, 112-106. Ang Spurs giila nga usa sa labing lig-on nga team sa West Conference gawas sa defending champion Golden State Warriors.

Nagmangtas silang Russell Westbrook ug   Kevin Durant alang sa Thunder diin miiskor sila’g 33 ug 22 matag usa.

Ang Spurs kinsa gipalig-onan nilang LaMarcus Aldridge gikan sa Portland Trail Blazers ug David West gikan sa Indiana Pacers, gipangulohan ni 2014 Finals MVP Kawhi Leonard.

 Didto sa Staples Center, mikulit og emosyonal nga kadaugan sa ilang season-opening game ang Minnesota Timberwolves human ilang gipatapsingan ang host Los Angeles Lakers, 112-111 tulo ka adlaw human sa kamatayon sa ilang coach nga si Flip Saunders.  

Si Ricky Rubio maoy nangu sa Timberwolves sa iyang 28 puntos, samtang ang Lakers gipangulohan ni Kobe Bryant kinsa miposa’g 24 puntos. 

May purohan untang modaog ang Lakers, apan misipyat sa iyang   game-winning shot si Louis Williams.

Sa lain pang mga resulta  sa NBA, ang Miami Heat mipakaging  sa Charlotte Hornets, 104-94 pinaagi sa pagtimon ni Chris Bosh nga mihakot og 21 puntos uban sa 10 ka rebounds.

Didto sa FedEx Forum, si Kevin Love miiskor og 17 puntos uban ang 13 ka rebounds, samtang si  Richard Jefferson adunay 14 puntos aron giyahan ang Cleveland Cavaliers ngadto sa 106-76 nga kadaugan batok sa Memphis Grizzlies.

Midaog sab ang Denver Nuggets pinaagi sa paglubong sa Houston Rockets, 105-85, ang  Washington Wizards nakaipsot batok sa Orlando Magic, 88-87, midaog ang Boston Celtics batok sa Philadelphia Sixers. Ang Toronto Raptors mipukan sa Indiana Pacers, 106-99,  gilat-an sab sa New York Knicks  ang Milwaukee Bucks, 122-97,  ang Dallas Mavericks mipukan sa Phoenix Suns, 111-95 ug  ang L.A.  Clippers batok sa Sacramento Kings, 111-104.  (BANAT PALARO)