CEBU, Philippines - Nagkinahanglan na lang og usa ka daog ang University of San Carlos Warriors aron matambalan ang ilang kauhaw sa korona sa Cebu Schools Athletic Foundation, Inc. (CESAFI).
Kini human midaog ang Warriors batok sa University of the Visayas Green Lancers, 87-76 sa
Game-3 sa ilang “best-of-five” championships series sa 15th CESAFI men’s basketball tournament kagabii didto sa Cebu Coliseum.
Kun pareho ang ipakita nilang duwa ugma sa Game-4, daku’g purohan ang Warriors nga ilang masakmit ang una nilang collegiate title sukad niadtong 1958 dihang ang liga gitawag pa og Cebu Collegiate Association (CCAA) ug dayon giusab ngadto sa Cebu Amateur Athletic Association (CAAA) hangtod nga nahimong CESAFI.
Ang kadaugan sa Warriors tukma kaayo isip ilang birthday gift ngadto sa ilang coach nga si Britt Reroma, kinsa magsaulog sa iyang adlaw’ng natawhan karong adlawa.
Ang import sa Warriors nga si Shooster Olago wala kapugngi sa halos tanan nga departamento diin iyang napuhalan ang import sa Green Lancers nga si Steve Cedrick Akomo, kinsa na-fouled out sa nahabiling 6:10 sa final period.
Si Olago mipabuhagay og 32 puntos diin ang 17 niini iyang nahimo sa fourth quarter. Gawas sa iyang puntos, si Olago milangkat sab og 17 ka rebounds aron ilhon isip best player of the game.
Si Olago nakakuha sab og suporta gikan ni Ian Jefferson Tagapan, kinsa mihatag og dakung kontribusyon sa Warriors pinaagi sa iyang 20 puntos uban ang tulo ka rebounds ug duha ka assists, samtang ang rebounding monster nga si Charles Pepito mitikdol og 10 puntos.
Nangulo sa Green Lancers mao ang ilang ace point guard nga si June Kent Manzo, kinsa niduwa nga adunay bandage tungod sa gisi nga iyang naangkon atol sa ilang kadaugan sa Game-2, 70-63 aron matabla ang series.
Si Manzo nga gidepensahan og maayo miiskor og 25 puntos. (BANAT PALARO)