CEBU, Philippines - Lain na sab nga makabungog nga kadaugan ang natala sa Team Monteroyo human nila gilubong ang Lolypop-Larobis, 85-68 sa 2nd Conference LABA President’s Cup 2015 basketball tournament niadtong Lunes didto sa Barangay Banilad Sports Center, Mandaue City.
Nagmangtas dayon si Tawing Grafe diin siya ang miiskor sa unang 10 puntos sa Monteroyo sa first period. Si Grafe adunay kinatibuk-ang 21 puntos aron pangulohan ang Monteroyo nga nagbitbit og 2-0 nga baraha.
Ang Monteroyo ni team manager ug playing coach Dr. Raul Monteroyo nakakuha sab og maayong suporta gikan ni Rey Gonzaga, kinsa miamot og 17 puntos ug Albert Ramos nga mitampo’g 11 puntos.
Grabe kaayo ang determinasyon sa Monteroyo nga modaog human sila moposte’g 45-29 nga bentaha sa halftime.
Misiwil ang kadaugan sa Monteroyo human sila mitala sa labing daku nila nga labaw nga 30 puntos, 69-39 sa nahabiling 4:50 sa third period.
Ang Larobis nga kausa lang nakatilaw og labaw, 11-10, gipangulohan nilang Canjo Echavez ug Llanos nga pulos adunay 15 puntos ug ni Richard Madrid sa iyang 14 puntos.
PUNTOS MATAG USA
Monteroyo (85) – Grafe 21, Gonzaga 17, Ramos 11, Bacatan 7, Paciencia 6, Bontilao 6, Monteroyo 5, Hatamosa 4, Baunsit 4, Ecot 2, Lepon 2.
Lolypop-Larobis (68) – Echavez 15, Llanos 15, Madrid 14, Ouano 6, Niez 6, Yatan 4, Malazarte 2, Joe 2, Delima 2, Lavadora 2.