CEBU, Philippines - Mihimo’g 24 puntos ang University of Cebu Junior Webmasters sa third period aron mokulit og come-from-behind victory, 54-49 batok sa University of San Jose-Recoletos Baby Jaguars sa opening match sa Cebu Schools Athletic Foundation, Inc. (CESAFI) basketball tournament kagahapon diha sa Cebu Coliseum.
Ning pagsuwat, padayon pa nga nagduwa ang UC Webmasters batok sa USJR Jaguars sa seniors division.
Biya unta og sayes puntos ang Junior Webmasters sa halftime, 21-27, apan ilang nasakmit ang labaw human sa third period pinaagi sa ilang 24-13 scoring.
Si Froilan Mangubat mihimo’g rebounding record sa high school human siya milangkat og 24 rebounds uban ang iyang 15 puntos. Si Jason Florence Abejo miamot og 15 puntos uban ang walo ka rebounds.
Ang gamitoy’ng point guard nga si Gelmart Umpad maoy nagkontrolar sa duwa sa uwahing bahin sa fourth period diin siya maoy nagpatay sa oras. Daku sab siya’g natabang ilabi na sa assists bisan og igo lang siyang miamot og kuwatro puntos.
Si Geo Ibero maoy nangu sa napilde nga Baby Jaguars sa iyang 14 puntos, samtang si Jude Benedict Teleron adunay 11 puntos (BANAT NEWS)