CEBU, Philippines - Mihatag na sab og laing dungog sa nasud ang Filipino Mixed
Martial Arts (MMA) fighter nga si Erik Kelly human siya midaog batok ni Rob Lisita sa Australia sa miaging gabii sa ONE Fighting Championship didto sa Taiwan.
Si Kelly, kinsa bag-o lang nakabalik og duwa human ma-injured sa miaging tuig, nameligro sa unang round dihang mibarag siya human maigo sa kumo ni Lisita.
Apan ang Pinoy warrior mipakita sa iyang kaisog ug natuok niya si Lisita pinaagi sa usa ka rear naked choke sa second round.
Sa maong kadaugan, si Kelly nakaangkon og kahigayonan nga moaway alang sa world title batok ni ONE FC featherweight champion Koji Oishi sa Japan.
Si Oishi maoy mipalagpot kaniadto sa Pinoy champion nga si Honorio Banario rason nga sagol panimalus ang gibuhat ni Kelly. (BANAT NEWS)