CEBU, Philippines - Midaug ang Chatteau de Busay batok sa Nivel Hills-Lahug sa iskor, 59-42 sa usa ka non-bearing game aron mokumpleto sa Top 5 teams sa nagpadayong midget division tournament sa Sunrise All Sports Association (SASA) didto sa SASA open court sa Lahug.
Ang Chatteua de Busay ug Nivel Hills gi-ubanan sa Tophill, Tarcom ug sa Sudlon Sasapaw.
Karong umaabot Sabado, sugdan sab ang torneyo sa mini division nga pagasalmotan sa mga players nga may 12 anyos paubos ang panuigon.
Ang gustong mosalmot sa maong torneyo mahimong mokontak sa organizer nga si Robert Oretag sa numero 0933-493-9657.
Sa laing bahin, nagpasalamat ang mga tigpasiugda sa SASA Junior of Lahug ngadto sa host Talaga, Argao sa miaging semana sa usa ka friendly match. Bisan og pilde ang SASA, malipayon kaayo sila tungod sa maayong pagka-atiman nilang Gelran Gelbolingo ug ni Engr. Jalod Sarip.
Kulbahinam hinoon kaayo ang maong duwa diin miadaug ang Talaga sa iskor, 96-94.
Ang mga opisyales sa SASA nga mikuyog didto sa Talaga, Argao mao silang Billy Gabiana, Max Caballes ug Jun Julian. (BANAT PALARO)