CEBU, Philippines - Andam na ang tanan alang sa second leg sa Man and Machine Supercross 2014 series karong Sabado ug Domingo diha sa South Road Properties (SRP) grounds duol sa St. Calungsod Shrine.
Dili na sab makasalmot ang No. 1 rider nga si Glenn Aguilar tungod kay mosalmot kini sa usa ka motocross tournament didto sa Estados Unidos.
Tungod niini, ang pambato sa Sugbu nga si Jon-Jon Adlawan ug si Rhowell Mangosong sa Mindanao ang gipaabot nga maoy magtigi sa dakung dungog.
Apan, ang duha makasugat og lisud nga hagit gikan sa Hungarian nga si Decsi Balaz, kinsa maoy naghari sa first leg niadtong Pebrero.
Lain pang atngan sa maong lumba mao sila si Donark Yuzon, Jubenile Abellar ug Ambo Yapparcorn.
Ang modaog sa pro open category human sa final leg sa maong nationwide motocross series nga mahitabo sa Disyembre maoy ilhon isip "Rider of the Year."
Gawas sa pro open, lain pang mga kategoriya nga tigian sa duha ka adlaw nga lumba naglakip sa pro lite, open enduro, underbone, novice open, women’s open, local enduro, intermediate, peewee 50 ug 65 cc, veterans A,B ug C ug mini-category. (BANAT NEWS)