CEBU, Philippines - Gipahimuslan sa Cebu International School (CIS) ang ilang "homecourt" advantage aron mosakmit og duha ka korona ug tulo ka runner-up trophies sa football event sa CIS Kyle Weckman and James Jung Memorial Friendship Cup niadtong weekend didto hawanan sa maong eskwelahan sa Brgy. Pit-os, ning siyudad.
Ang CIS booters miugkat og titulo sa mixed under-7 human nila gipilde ang Consolacion FC.
Gipukan sab sa CIS ang Sacred Heart School-Ateneo de Cebu (SHS-AdC) pinaagi sa penalty shootout, 1-0 aron langkaton ang korona sa girls 18-under.
Wala hinuon magmahay ang SHS-AdC human midaog og korona sa girls 14 pinaagi sa superior output nga 10 puntos.
Ang CIS midaog og first runner-up honors sa under-11, boys 15 ug boys 18 age groups.
Ang Giuseppe ug Barili FC nanghawod sa under-11 ug boys 15 categories.
Nidaog sab ang Leylam FC batok sa CIS, 2-0 aron maghari sa boys 18 division.
Sama sa CIS, ang Warshockz midaog sab og duha ka titulo. Ilang gipilde ang Consolacion FC, 2-1 sa mixed under-11 finals, dayon mipaluhod sa St. Thomas, 3-0 aron maghari sa boys 13 division.
Sa inter-company, ang Makoto FC maoy misakmit sa kampiyonato human gipilde ang Leylam, 2-1, samtang ang Don Bosco Alumni nidominar sa men's open action bitbit ang 2-0 nga kadaugan batok sa Cebu Amateur Football Club.
Ang University of San Carlos (USC) maoy misakmit sa korona sa ladies open human nila gipilde ang Brainboss, 1-0. (BANAT PALARO)