2013-2014 NBA Season duol na gyud

Matapos na ang NBA pre-season games karong Biyernes, Oktubre 25 ug gisugdan kini niadtong Oktubre 5 diin naglakip kini sa duwa tali sa Houston Rockets batok sa Indiana Pacers kaniadtong Oktubre 10 didto sa Mall of Asia  Arena nga mao sab ang benyu sa miaging 2013 FIBA Asia Championship diin ang RP Smart Gilas maoy second placer human mapilde sa mas tag-as ug beteranong Iranian team.

Mosunod niini ang regular season karong umaabot Oktubre 29 diin mo-host ang defending champion Miami Heat batok sa Chicago Bulls.

Segurado na sab nga adto na sab kita magyampungad atubangan sa atong tagsa-tagsa ka tv set aron masaksihan ang mga live games sa NBA. Kung ang uban natong mga kababayan miadto lang gyud sa MOA aron pagsaski sa duwa tali sa Houston ug Indiana nga mahal kaayo ang ticket, walay katarungan nga dili kita motan-aw sa tv nga libre ug ang bayranan lang ang imong monthly bill sa cable provider. Ang akong gigamit sa amung balay CIGNAL.

Tataw nga mosamot gyud kasikat ang NBA dinhe sa Pilipinas human niadtong makasaysayanong pre-season game nga maoy labing unang duwa sa NBA dinhe ug bisan ato kadtong matawag nga usa ka exhibition game, mao man sab kadto'y unang duwa sa duha ka NBA teams. Dunay mga duwa dinhe nga nagpasundayag sa mga inilang NBA players apan mga Pinoy ang kontra. Duna say mobisita dinhe sa Pilipinas apan igo lang mag-promote sa ilang mga gi-endorse nga mga brand sa sapatos.

Ang NBA regular season matapos unya sa Abril 16. Aron paghatag og dugang attraction ug kalingawan sa mga fans, maanindot kaayo ang pairings sa Christmas Day games diin makigsangka ang Brooklyn (host) batok sa Chicago Bulls, Oklahoma at New York, Miami at Los Angeles, Houston at San Antonio ug Golden State at Los Angeles (Clippers).

Ang 2014 NBA playoffs magsugod sa Abril 19 ug sugdan ang NBA Finals sa sayong bahin sa Hunyo.

Pipila lang ka buwan human modaug ang Miami batok sa San Antonio sa NBA finals, nahitabo dayon ang pagpangtaktak sa mga team officials sama sa managers ug coaches ug ang uban sab mi-resign samtang ang uban sab wala na mopirma og contract extension.

Usa sa makapakurat nga paglahugay o mga "coaching changes" karon sa NBA gawas pa gyud sa mga trade, mao ang pagbalhin ni coach Doc Rivers ngadto sa L.A. Clippers gikan sa kanhi team nga iyang gihatagan og korona niadtong 2008 ang legendary Boston Celtics.

Misamot pa gyud kitang mahipugwat tungod kay ang iyang mga star players sa Celtics nga silang Paul Pierce ug Kevin Garnett mibalhin ngadto sa Brooklyn Nets kinsa bag-o sab og coach nga si Jason Kidd human moretiro isip player sa New York.

Pinaka-una niini mao ang pagpalagpot kang Byron Scott isip coach sa Cleveland niadtong Abril 18 human sa tulo ka tuig nga pagdala sa team ug gitaktak sab si Lawrence Frank isip coach sa Detroit human sa duha ka tuig isip mentor ug sa mao gihapong petsaha, mi-resign si Doug Collins isip coach sa Philadelphia.

Nianang pagka Abril 22, gitaktak sa Phoenix ang ilang general manager nga si Lance Blanks ug pagka sunod adlaw, gipalagpot sa Charlotte ang ilang coach nga si Mike Dunlap ug dayon, gikuha og balik sa Cleveland ang ilang kanhi coach nga si Mike Brown.

Niadtong Mayo 1, gipahibalo sa Milwaukee nga ang ilang interim coach nga si Jim Boylan dili interesadong mobalik isip usa na ka head coach ug pipila ka adlaw, nahimo sab nga head coach sa Brooklyn si P.J. Carlesimo ug nahimo sab nga bag-ong general manager sa Phoenix si Ryan McDonough kinsa maoy kanhi assistant general manager sa Boston.

Wala madugay, gitaho sab nga dili na mobalik si Vinny del Negro isip coach sa L.A. Clippers human sa tulo ka tuig nga serbisyo hinungdan nga gipulihan siya ni Rivers.

Didto sa Toronto, gipahibalo sab nga dili na mobalik pagka-GM si Bryan Colangelo sa Raptors.

Gipulihan sab ang interim coach sa Phoenix nga si Lindsey Hunter ni kanhi Suns player ug Utah Jazz assistant coach nga si Jeff Hornacek ug gipulihan sab si Larry Drew isip coach sa Atlanta kinsang kontrata wala na lugwayi.

Bag-o na sab karon ang coach sa Boston nga si Brad Stevens. Sa kataposang adlaw sa Mayo, miluwat sab sa iyang katungdanan si Keith Smart isip coach sa Sacramento ug gipulihan si Drew ni Jim Boylan isip coach sa Atlanta.

Si Mike Malone mao na sab karon ang bag-ong coach sa Kings ug gipahibalo dayon sa Denver nga dili na sab mobalik pagka-coach si George Karl alang sa Nuggets ingon man si Lionell Hollins sa Memphis Grizzlies nga gi-zerohan gyud sa Spurs sa West Finals.

Gipulihan na sab ang coach sa Detroit sa kanhi Oklahoma assistant coach nga si Maurice Cheeks ug ang mopuli kang Karl sa Denver mao na si Brian Shaw.

Ang labing bag-ong gipangtudlo nga head coaches mao silang David Joerger alang sa Memphis, Brad Stevens alang sa Boston ug Breet Brown alang sa Philadelphia.

MISCELLANEOUS. Welcome home Junjun Narvasa from Saudi Arabia who is here for a paid vacation leave. Congrats to his wife Leslie for giving birth a bouncing baby girl last Otober 18 at the Cebu Maternity House under the care of OB-Gyne Mrs. Vilma Malagar-Lastimosa, my cousin from Consolacion, Cebu.