CEBU, Philippines - Pabiling walay pilde si ALA rising prospect Melvin Gumban human niya gilupig pinaagi sa unanimous decision si Fernando Ocon sa main event sa ALA-Cobra: ‘Tunay na Lakas Boxing’ sa miaging gabii sa Mandaue City Plaza Square.
Ang 23-anyos nga boksidor migamit sa iyang jab ug hait nga kombinasyon aron sumpuon ang agresibong istilo ni Ocon kinsa naglisud pagsulbad sa istilo ni Gumban.
Sa second round, usa ka makabungog nga right straight ang gipatugpa ni Gumban ngadto sa lawas ni Ocon kinsa natumba, apan nakahimo kini pagbarug ug nagpadayon sa round.
Gikan didto ang garbo sa Escalante City, Negros Occidental nga si Gumban mikontrolar sa away og padayun siyang mipasulod og mga tira ngadto sa ulo og lawas ni Ocon.
Human sa 10 ka rounds, tulo ka mga hurado ang miiskor og 97-92, 95-94 ug 96-93 tanan pabor ni Gumban. Sa maong kadaugan si Gumban mipalambo sa iyang record ngadto sa 14-0, unom niini gikan sa knockout, samtang si Ocon nakahiagum sa iyang ikaupat nga pilde sa 14 ka away.
Sa supporting bouts, midaog pinaagi sa knockout sa second round ang laing ALA stalwart nga si Juren Labordo batok ni Rowell Garcia, samtang midaog usab pinaagi sa second round TKO batok ni Rey Morales kinsa napugos pag-undang tungod sa injury.
Si Lito Dante midemolis ni Rez Padrogane sa fifth round, samtang ang taga-Bohol nga si Bryan Lobitania midispatsar ni Rocky Alvarez sa second round ug midaog usab pinaagi sa puntos si Albert Villacampa batok ni Pedro Balaba. (FREEMAN)