CEBU, Philippines - Ang Team Olkas mipilde sa Bagtik, 90-82 aron masakmit ang kampiyonato sa 1st Lou Ornopia basketball tournament niadtong Domingo didto sa Barangay Calambua open court sa San Remigio, Cebu.
Nabiyaan ang Olkas og siyete puntos sa halftime, 37-44, apan sila si Jei Dablo ug Yuson mipasiugda'g rally aron mailog ang labaw, 64-58 sa third period.
Giusban kini ni Ursal, kinsa miiskor og 11 sa iyang 26 puntos sa final period nga maoy hingpit mihatod sa ilang koponan ngadto sa kadaugan.
Sa sayo pa, ang San Miguel midemolis sa Ilihan, 90-66 aron sakmiton ang third place trophy.
Gikan sa 12 puntos nga labaw sa first half, 44-32, gipakusgan pa sa San Miguel ang ilang opensa aron moposte og 24 puntos nga kadaugan.
Ang Team Olkas mibulsa og P10,000 sa maong kadaugan, samtang ang second ug third placers nga Bagtik ug San Miguel nakadawat og P7,000 ug P5,000 matag usa. Ang Ilihan nakaangkon og consolation prize nga P3,000.
Ang awarding ceremony gitakda karong Sabado sa gabii atol sa kapistahan sa Calambua agi'g pasidungog sa ilang mahal nga patron San Vicente Ferrer.
Gawas sa top performing teams, ang outstanding individual achievers sama sa MVP ug Mythical Five ang tagaan sab og pasidungog.
Gipasiugdahan sa Calambua Barangay Council uban sa abag sa MS Motosuit, ang usa ka bulan nga torneyo nahimong posible pinaagi sa suporta sa Bradder Moto Access, F&FO Motor Parts, Sanitec General Services, Speed-up Motor Parts, RMO Motor Parts, Prospeed, Motomaze, JCO Motor Parts, Keiz BJ Motors, Andy Uy, Leizel Navarez, Diosdado Navarez, Anong Lumapas, Jerry Samarita, Vincent Golbe ug sa mga pamilyang Saludar, Ycot, Ornopia, Montealto, Armenion, Jubay ug De la Peña.
PUNTOS MATAG USA
Unang duwa:
San Miguel (90) - Dabalos 35, Ruelo 25, Argawanon 15, Cuer 6, Domalaoco 5, Sido 4
Ilihan (66) - Romagos 24, Gualin 8, Monterola 8, Inoc 7, Ruva 5, Codiñera 4, Neis 3, Ducante 2, Monterola 2,Fuentes 2, Prescillas 1
Ikaduhang duwa:
Olkas (90) - Ursal 26, Dablo 20, Barro 13, Velasco 10, Yuson 7, Edisan 6, Ornopia 5, Brigoli 3
Bagtik (82) - Lopez 23, Cesa 16, Migabon 15, Talisic 15, Frasco 13