Karong napriso na
Kon si Rodrigo Duterte pa ang nagtungkawo sa Malakanyang:
• Dili mabisto sa Anti-Money Laundering Council ang P6.77 bilyones nga mga transaksiyon sa bank accounts ni Bise Presidente Sara Duterte ug sa iyang bana;
• Dili mahibaw-an ang P448 milyones nga gipa-uli sa Commission on Audit sa confidential funds ni VP Sara nga gipatakaan og gasto sa 2022 ug 2023 (apil sa nakadawat silang Mary Grace Piattos ug kaubanan); ug
• Dili maka-atubang si Ramil Madriaga sa House Justice Committee, wala gani seguro buhi pa bang nakapirma og affidavit sa iyang prisohan.
* * *
Kon si Rodrigo Duterte pa ang presidente:
• Walay impeachment proceeding nga mahimo sa House batok sa iyang anak, gipahilom si bisan kinsang nangahas sa pagpasaka sa impeachment complaint ug gipakauwawan ang kongresista nga nangisog pag-endorse sa reklamo; o
• Kon napugos ang justice committee pagpatawag og public hearing, walay bisan usa ka opisyal sa administrasyon nga nitahud sa ilang imbitasyon, kay gibabagan sa Malakanyang, sama sa pagdili ni Duterte sa mga sakop sa iyang gabinete sa pag-atubang sa Senate Blue Ribbon Committee nga nangimbestigar sa Pharmally scandal atol sa pandemya.
* * *
Kay wala na man si Rodrigo Duterte sa gahom:
• Nahukman sa Korte Suprema nga ilegal ang iyang pagtaktak ni kanhi Overall Deputy Ombudsman Melchor Arthur Carandang (pero naabtan hinuon og walo ka tuig una nabadlong ang abuso); ug
• Na-absuwelto sa tanang tulo ka kasong kriminal si kanhi Senador ug karon Kongresista Leila de Lima (kapin unom ka tuig nga nagyangu-yango ang Korte Suprema ug lower courts sa mga ebidensiya ug testimoniya nga gi-imbento sa administrasyong Duterte).
* * *
Karong napriso na si Duterte sa The Hague:
• Hinaot nga mapasakaan og mga kaso aron masilotan ang tanang opisyal sa gobyerno nga nagpagamit sa paglubag sa mga balaod, sa pagguba sa mga institusyon ug sa pagpanghasi sa iyang mga kaatbang ug sa kinabag-an sa katawhan;
• Dili lang sa mga kaso nilang Carandang, de Lima ug extrajudicial killings kon dili sa pagpahagsa sa nasudnong ekonomiya, sa pagpaburot sa nasudnong utang, sa pagpasiugda sa grabeng kinawatay (nga mas gipaburot sa administrasyon ni Presidente Ferdinand Marcos Jr.) ug sa pagpalambo sa kultura sa pagpanlaktod, pagbinastos ug pagpakatap og walay kinutoban nga mga bakak.
* * *
- Latest
