EDITORYAL — Gikiha aron motagam

Gikasohan gyud sa Regional Highway Patrol Unit-7 ang duha ka mga content creators nga nakamugna og kahasol sa dagan sa trapiko sa nanglabay nga mga semana ning tuiga.

Ang duha gikasohan og unjust vexation ug alarm and scandal ngadto sa piskalya sa tinguhang dili na kini mousab ug dili na sab sundon sa ubang content creators.

Husto ug makatarunganon kining gibuhat sa kapolisan, kay kana bitaw’ng mga sakyanan nga maaberya unya makabalda sa dagan sa trapiko matiketan man gani ug makamulta bisan dili tinuyoan.

Kana pa hinuon nanuyo gyud paghasol-hasol sa dagan sa trapiko. Daghang mga delatar tungod sa ilang gibuhat aron lang maka-content.

Gani bisan sa ilang personal nga pagpangayo og pasaylo pinaagi sa pag-adto sa buhatan ni Police Col. Wilbert Parilla sa RHPU-7 gi-rekord pa ug gigamit sab nga content, dili ba ni mora'g pagbugal-bugal sa otoridad?

Maayo lang unta og makiat-kiat sila nga sila lang mahasol ug walay maamong, wala ra nay problema. Apan kun makadisturbo na sila sa uban dili na kana maayo.

Alang kanila maayo kay sila may nanuyo pagbuhat, apan sa mga tawo nga nahasol wala. Unsaon nalang kun sa ilang gibuhat adunay nasakitan o ba kaha dakong trahedya nga nahitabo?

Ang karsada para gyud sa tanan, apan para sa tinarong nga paggamit niini ug dili para sa personal nga katuyoan sa pipila lamang.

Ang pagpasaka og kaso sa kapolisan magsilbi untang leksiyon sa tanan ilabi na niadtong mga content creators nga gustong maghimo sab og ilang salida diha sa karsada.