Ayaw pangolekta ha?

Miatubang sa mga sakop sa Cebu City Traffic Management Board ang kadagkoan sa Tokagawa Global Corporation ug ilang giangkon nga sayop ang ilang gihimo nga nangolekta og parking fees sa adlaw’ng Domingo bisan og wa pay pagtugot.

Gihulagway sa akong kauban sa board nga buotan ang mga tag-iya sa Tokagawa nga maoy nagdumala sa CEPMA dinhi sa Cebu City nga nangolekta og parking fees sa mga sakyanan nga moparking daplin sa karsada. Aw, tinuod bitaw nga maayong ikasulti ang mga dagkong opisyal sa Tokagawa, apan ang ilang mga sinaligan nga nagdumala sa pagpangolekta sa parking fees dili motuman sa gikasabotan. Anugon kaayo kay sa miting namo sa Traffic Board kaniadtong Martes, wa ko makatunga kay nagpahilot ko sa akong piang. Wa man giapil sa agenda nga motunga ang mga opisyal sa Tokagawa mao nga nagpahilot na lang ko didto sa bukid. Misuway pa kuno og pangatarungan ang mga opisyal sa Tokagawa wa man kuno’y ordinansa nga nagdili sa pagpangolekta og parking fees sa adlaw nga Domingo, mao nga nangolekta sila. Apan klaro kaayo ang katuyoan sa Cebu City government nga ang Domingo ihatag kini nga mora’g “rest day” sa mga tag-iya og sakyanan nga dili sila mobayad og parking fees sa pag-park nila sa ilang sakyanan daplin sa karsada.

Unya, nganong nangolekta man sila lapas sa alas 7 sa gabii nga klaro man kaayo sa Joint Venture Contract nga gipirmahan sa mga opisyal sa Tokagawa ug ni Mayor Michael Rama nga kutob ra sa alas 7 sa gabii ang pagpangolekta?

Kon gusto nila nga ilahos sa alas 9 sa gabii ang pagpangolekta, ug apilon ang Domingo kay gusto nilang tilokon ang katapusang sensiyo sa mga tag-iya’g sakyanan, paghuwat mo nga kahimoan og kausaban ang JVC sa City Council. Giawhag ni Atty. Dominic Ong, ang executive assistant ni Cebu City Councilor James Cuenco, ang kadagkoan sa Tokagawa nga mentras wa pay kausaban sa JVC, moundang usa sila sa pagpangolekta sa Domingo.

Buyno, atong panid-an kon tumanon ba kini sa Tokagawa, kay usbon ko, maayo kaayo silang mosaad apan dili motuman sa gikasabotan. Dugay na man gud nako kini nga gihangyo kanila nga dili mangolekta og Domingo, apan moinsister gyud. Karong Hunyo 11, moatubang kuno pagbalik ang mga opisyal sa Tokagawa sa Cebu City aron motambong sa among miting sa Traffic Board. Kana, paniguroon nako nga makatambong na gyud ko niana. Maayo unta og si Cebu City Acting Mayor Raymond Alvin Garcia magmugna na og Oversight Committee nga maoy motan-aw sa kalihokan sa pagpangolekta og parking fees aron dili na makabasta-basta paghimo’g kausaban ang Tokagawa nga dili mananghid.