Kaminyoon, saad ug panumpa

Duha lang sa 11 ka mga kongresista sa Sugbo ang mibotar pabor sa pagpasar sa Divorce Bill alang sa third ug final reading didto sa House of Representatives niadtong Miyerkules sa gabii.

Sila si Kongresista Pablo John Garcia sa third district ug Deputy Speaker Duke Frasco sa fifth district pabor sa pagpatuman sa divorce dinhi sa nasud.

Ang uban nga mga kongresista sa Sugbo, gawas ni Lapu-Lapu City lone district Rep. Cindi Chan nga on official leave, supak sa divorce.

Alang sa mga nipabor sa Divorce Bill way isyu sa Constitutionality sa maong balaudnon sanglit sukwahi sa argumento sa mga misupak niini gitumong kuno kini aron pagprotehir sa pamilya nga nabiktima sa kahigayonan.

Kini sanglit ang maong balaudnon maghatag man og mas dali ug mas barato nga paagi aron ang usa ka tawo nga nagapos sa "sayop" nga kaminyoon makalingkawas ug kahatagan og bag-ong kahigayonan nga magsugod og pamilya.

Nakasabot ko sa baruganan sa mga nipabor sa divorce labi pa niadtong mga nakasinati na og pakyas nga kaminyoon apan pabiling nagapos niini ug nahikawan sa kahigayonan nga magminyo pag-usab sanglit dili sila makasugakod sa kamahal sa gasto alang sa annulment.

Apan hinaut sab nga ilang nasabtan nga ang kaminyoon dili usa ka yanong kontrata nga mahimong kanselahon bisan unsang orasa.

Ang kaminyoon, labaw sa usa ka ordinaryong kontrata, usa ni ka covenant kon saad ug panumpa atubangan sa altar nga bisan unsay mahitabo sa umaabot imong dawaton.

Way perpekto nga kaminyoon, ang tanang mga magtiayon niagi og lain-lain nga matang sa mga pagsulay.

Sa wala pa mosulod ang magtiayon sa kaminyoon niagi ni og mga seminar diin gipasabot sila og maayo unsay ilang sudlan. Wala gyud malakip sa mga seminar sa dili pa ang kasal nga mahimong imong iuli ang imong pares kun dili na mo magkasabot.

Atol sa seremonyas sa kasal, nanumpa mo sa usag usa atubangan sa altar nga kamo mag-inunungay sa kasakit ug kalipay ug sa kakabus ug kahamugaway.

Kun himoong sayon ang panagbulag sa magtiayon pinaagi sa divorce mas mosamot nga mawad-an og bili ang kabalaan sa kaminyoon.

Mahimong iuran-uran nalang ang pagpakasal bisan wala pa makasigurado sa kinaiya sa usa ka tawo tungod kay magsalig nga kun di magkasabot sayon ra ang pagkuha og divorce.

Kun kini mahitabo mas modaghan ang broken family sa nasud. Ug sigun sa mga pagtuon sagad sa mga nahimong problema sa atong katilingban gikan sa broken family.