Gikompirma sa Philippine Navy

Gikompirma sa Philippine Navy nga ang labing dako nga barko sa Chinese coast guard nga gianggaan og “Monster,” anaa nagpatrolya sa kadagatan sa Panatag (Scarborough) Shoal. Ni’ng bag-ong agresyon sa China, wala gihapo’y tubag ang atong mga opisyales nga daw sa wala la’y nahitabo.  Sugyot sa akong amigo, aron masulbad ang suliran sa WPS, “Magsabot na lang ang China ug Pilipinas nga ihatag sa China ang kadagatan ug ihatag sa Pilipinas ang mga isda sa ilawom niini. Sa ato pa, sa China ang sabaw, ato ang unod”.  Pagkatoytoy!

Uyamot nga pamensar

Gituohan sa Department of Agriculture nga ang paghatag og toll rebates sa mga truck nga nagdala og mga abot gikan sa umahan, ubos sa gipatuman nga Agri-Truck Toll Rebate Program, makatabang pagpakunhod sa inflation ug makapamenos sa presyo sa palaliton.  Wala ako’y nakita nga direkta’ng basehan ni’ng pamahayag sa DA.   Nilutaw ang pagka-uyamot o pagka-mediocre sa panghunahuna sa mga opisyales sa DA hinungdan nga uyamot usab ang kahimtang sa atong sektor sa agrikultura.  Haum ang panultihon nga “Ang pagka-uyamot sa panghunahuna, o mediocrity, maoy mamumuno sa kabag-ohan ug labing laksot nga kaaway sa kalambuan”. Muleeng!

Wala masayod unsay buhaton

Gikompirmar ni AGAP party-list representative nga si Nicanor Briones nga overpriced ang karne’ng baboy nga gibaligya karon sa tag-P420 ang kilo.  Gisagubang pa gihapon sa mga magba-baboy ang suliran sa ASF nga wala pa gyud mahatagi’g sulosyon sa Department of Agriculture bisan kon aduna na’y bakuna batok niini nga gigamit na sa laing nasud sama sa Vietnam.  Ang kakulang sa diskarte ug ang pagmika sa atong mga opisyal sa DA, haum sa mga linya sa awit nga nagkanayon, “Wala na masayod kon unsa ang angay buhaton: handomon ka ba, kasillagan ka ba o kalimtan na lang?”.  Fezteleern!

Napilayan pagsamot

Gimando ni Cebu City Acting Mayor Raymond Alvin Garcia nga undangon gilayon ang pag-printa sa mg PWD Identification cards (ID) samtang nagpaabot sa resulta sa imbestigasyon kabahin sa giingon’g pagpamaligya og ID bisan ngadto sa mga piskay og panglawas.  Gimando usab sa Acting Mayor ang paglahugay sa PWD Unit ubos sa DSWS.  Tataw nga seryoso ang Acting Mayor sa pagresolbar ni’ng maong isyu.  Matud pa sa akong amigo, “Ni’ng kamanduan sa acting mayor nga pagsuspendi sa pagprinta og mga bag-ong PWD ID, maingon nato nga “napilayan ug napi-angan” pagsamot ang sektor sa mga disabled”.  Fishkots!

Wala na’y mag-uuma

Nakigtagbo si Cebu Governor Gwendolyn Garcia sa mga mag-uuma ug mga tag-iya’g yuta sa Camotes Island aron kumbinsihon sila nga mananom og yellow corn kay mao kini karon ang produkto nga taas ang demand. Ang dako nga problema karon sa sektor sa agrikultura dili ang kon unsay itanom kon dili, wala na’y mga mag-uuma nga motanom.  Makapahinumdum sa aplikante sa pagka-sundalo nga sa dihang gipangutana kon andam ba siya magpakamatay alang sa yuta’ng natawhan, misulinga pagtubag nga, “Aah, pakamatyan ba uroy na’ng yuta’ng batoon nga bisan kogon, dili gani motubo.  Kamo lang uroy.”  Madahaan!