Karon ang adlaw sa mga anak sa singot nga literal gyud nga singot ang nahiaguman sa mga mamumuo nga nagbudlay sa adlaw adlaw aron adunay ikapaon sa mga pamilya.
Ang Labor Day dili lang niadtong mga nanarbaho sa mga kompaniya o kadtong adunay mga amao kun dili alang sa tanan nga naningkamot aron mabuhi pinaagi sa pagpanginabuhi.
Sa ingon niini nga panahon ang mahinumduman ra gyud kadtong sa mga tawong nangimpleyo ug makalimtan intawon kadtong mga mamumuo nga gitawag og freelancer pastilan nga sagad literal gyud nga nakasinati og grabeng kalisdahan, magkadunsingot sa pagkayod sa mga umahan, adunay uban anaa sa basurahan nanguha og bisan unsa nga pwede pang mabaligya aron ikapalit og pagkaon sa ilang pamilya.
Kasagaran gyud mga hisgotanan kong aduna bay good news alang sa mga trabahador, umento sa suholan nga padayong gisinggit sa mga mamumuoo kay lagi hilabihan na ka mahal ang presyo sa mga palaliton karon. Kong huna hunaon hayahay baya kining mga tawhana nga bisan og alang kanila gamay ang sweldo apan segurado man nga adunay makobra nga sweldo.
Samtang dili ikalimod nga adunay daghan karon nga mga tawo ang wala na sa gitrabahoan nga kompaniya tungod kay nanira na o nihunong sa ilang operasyon, kining mga tawhana maapil na usab sa grupo sa mga freelancer nga mohimo og diskarte aron makasugakod sa inadlaw adlaw nga panginahanglan.
Gawas niadtong mga nawad-an og trabaho, aduna usay mga bag-o la lang motapos sa ilang pagtungha nga mga walay trabaho kay mangaplay pa ug ang uban dili pa gyud madawat kay dili haum sa giaplayan nga trabaho.
Samtang nagpaabot sa job opportunity seguradong modiskarte usab kini aron maka-income, trabaho gihapon ang tawag niini informal lang.
Bitaw kining akong lindog karon gipahinungod sa tanan nga mga tawo nga naningkamot nga mabuhi ug ang mga tawo nga nagsalig kanila, basta kadtong padayon nga nikayod ug nagpatulo sa singot aron makahatag og batakan nga panginahanglan sa pamilya apil gyud to sa labor force nga angayan usab ilhon niining pagsaulog sa adlaw sa pamuo karong adlawa. Mga trabahante kumbati!