Dunay gidala nako dinhi nga batan-ong babaye. Ang iyang inahan maoy una nakong gikaatubang. Matud sa inahan maldita gyud ang iyang anak. Ako pud siyang gipangutana kun basin wala pud nila taronga og tagad ug atiman ang maong batan-on.
Nagpakahilom lamang ang maong inahan. Akong gipatawag ang maong batan-on. Reserved kaayo ang iyang tinubagan.
Apan sa kadugayan nitibi ang maong batan-on. Mahimong likayan niya ang akong mga pangutana apan dili niya mahimong likayan ang iyang pagbati. Dili mahimong bakakan ang iyang pagbati. Ang amahan nga unta simbolo sa seguridad nahimo namang usa ka dakong salikwaot alang kaniya.
Wala niya makita ang presensiya sa usa ka amahan hinunoa iyang nakita ang usa ka linalang nga kusog kaayo modagmal ug mobuhi og mga masakit nga mga pulong sa panghimaraot.
Kining maong kasinatian iyang gitipigan sulod sa iyang kasingkasing ug padayong gihambin panahon nga siya masuko. Lisud kaayo pugngan ang kasuko labina kun kini nag-alintabo.
Dili deliverance ug exorcism ang iyang gikinahanglan. Hinunoa, gikinahanglan niya ang Inner Healing ug kalingkawasan gikan sa pagkabilanggo sa pagbati nga makapaluya gumikan sa mga kamatuoran.
Kadaghan sa mga samaran karong mga panahona. Gawas sa pag-ampo gikinahanglan usab nila ang pagsabot ug pag-atiman mismo sa ilang kaugalingong mga ginikanan.
Gikinahanglan usab ang pahuway gikan sa mga tawong kanunay ug singgit ug singgaak lamang ang nahibaw-an. Ang maong paghilak usa man ka tiyabaw sa pagpakitabang .