EDITORYAL - Mga bakanteng luna, tamnan
![EDITORYAL - Mga bakanteng luna, tamnan](https://media.philstar.com/photos/2024/04/19/1_2024-04-19_00-10-55.jpg)
Ang Pag-Asa miingon nga dunay mga lugar sa Pilipinas nga naa gyud sa peligrosong panahon tungod sa grabeng pagsaka sa temperatura dala aning El Niño phenomenon.
Sa pagkatinuod, ang tibuok nasud gyud ang nakasinati og grabeng kainit sa panahon. Kun ang mga bukirong bahin sa mga probinsya nga dunay daghang kakahuyan nangauga na ug duna nay nangasunog, samot na ang kainiton diha sa mga siyudad.
Ang mga dagkong siyudad karon sama nalang dinhi sa Cebu City nga namungingi na sa kadaghan sa mga tag-as nga mga buildings, sementado ang halos tanang mga dalan ug kun duna may mga bakante pang mga luna gitabunan na og kongkreto kay gihimong mga parkingan sa sakyanan, mas grabe pa ang kainiton.
Kaning mga kongkretong estraktura nakapuno sa kainit sa lugar tungod kay naalihan ang natural nga hapak sa hangin gikan sa kabukiran ug sa kadagatan nga makapabugnaw unta sa palibot.
Gani nakatampo sab kini sa problema sa baha kay dili na basta makatuhop ang tubig sa uwan o baha sa ilawom sa yuta, ang resulta bisan asa nalang kini padung una pa maabot sa kadagatan.
Dunay sugyot kaniadto sa usa ka lokal nga opisyal sa Cebu City nga ang tukorong mga buildings kinahanglang mogamit og desinyo o moplastar sa ilang estraktura sa dapit nga dili makaali sa natural nga agianan sa hangin.
Apan dili kini basta mabuhat pagkakaron, ang labing paspas ug tingali malungtaron og benepisyong makuha ang siyudad magagikan lang niining mga nahibilin pang ginagmay nga mga bakanteng mga luna nga wala pa matabuni og mga semento.
Pwede pa kining patamnan og mga kahoy nga makahatag og landong ug bugnaw nga hangin sa palibot. Pwedeng mga kahoy nga mamunga og prutas nga makaon sa tanan.
Kinahanglan lang tingali nga himuon kining programa sa mga lokal nga LGUs ilabi na sa mga kabarangayan.
Tinuod medyo lisod kini kay kinahanglan gyung atimanon hangtud nga modako ang kahoy, apan dili kini imposible.
- Latest