Mapasipad-ong pagsulong

Gihingusgan sa National Bureau of Investigation (NBI) ang pagpangita kang kanhi Bucor Chief General Gerald Bantag, kinsa human pasanginli ni Justice Secretary Crispin ‘Boying” Remulla pinaagi sa trial by publicity nga maoy mastermind sa pagpatay ni anhing hard-hitting radio commentator Percy Lapid, gihimong wanted, diin may patong pang P2 million ang ulo. 

 Dugay nang nagtagotago si Gen. Bantag palayo sa himatikdan niyang dili patas nga Department of Justice ning panahon nga dili mahadlok og Ginoo ang mga lider nga gipang-appoint ni Presidente Bongbong Marcos. Gani, ang bag-o niyang gipili nga Philippine National Police (PNP) chief General Rommel Francisco Marvil, mianunsiyo mang ‘No war on drugs under his watch!’

Mga nahinganghang citizen nakapangutana: “Ngano kaha? Mao na ba kini usa sa rekisitos niadtong gustong mag-PNP chief?”

Niining bag-o, gisulong sa armadong NBI team ang mingaw-desenting balay ni Gen. Bantag didto sa Laguna. Human mangagi sa kinandadohang gate, nagpanon sila paingon sa lawak nga gituohang didto kini magtago. Apan pulidong pagkaserado ang pultahan.

Busa, ilahang gimaso ug unya gipatiran, ayha pa sila nakasulod. Gisusi nila ang tanang dapit sa sulod lakip na ang mga andana sa itaas samtang pulos nagpunting daan sa ilang mga tag-as armas dungan ang pagsinggit-pahibalo nga NBI sila.

Akoy gisakitan sa naghinobra nga kamangtas sa ilang gibuhat. Akoy naluoy sa matahom-malinis-malinawon kaayong balay nga ilang gitabangag pasipala bisan wala kini kamot ug tiil nga ikasukol. Dili na gani masirado ang nagubang pultahan nga mailhan kaayong inampingan sa tag-iya.

Unya, wala man silay Gen. Bantag nga nasikop, gipaskinan na lang nila ang pultahan og hulagway sa heneral nga may nakatatak: ‘WANTED’, sama sa usa ka notadong kriminal.

Sa mga tawong pro-War on Drugs-Duterte brand, sila saludo ug miila sa heneral nga usa ka hero. Kay milampos man pagpayhag sa mga kuwestiyonableng kubol sulod sa Bilibid. Wala sila makaayon sa gibuhat sa NBI team. Kay giisip nga usa ka mpasipad-ong pagsulong.

Maayong tawo si Gen. Bantag. Kaaway sa mga daotan, higala sa mga tarong. Andam man siyang moatubang sa tumotumong kasong gisang-at batok kaniya. Basta, patas lang ang timbangan sa atong Department of Justice ug si Boying moresayin. Unya mi-resign ba?

Aw, tago sab ang heneral!