Mopalit ka og motorsiklo?

Kadtong gusto nga mopalit og mga motorsiklo, basaha kining akong lindog aron kamo magiyahan kon unsay tukma ninyo nga buhaton sa dili pa ninyo paliton ang inyong magustohan.

Nasayod ko nga daghan kaayong mga motorcycle dealers nga pwerteng dugaya makaparehistro sa mga motor nga gibaligya nila. Ipasangil ra nila nga tungod kuno kini sa LTO.

Kon inyong sundon ang itambag ko kaninyo, dili ra gyud madugay ang pagrehistro sa mga motor nga inyong paliton gikan sa mga motorcycle dealers, ug magamit dayon ninyo ang motor.

Maluoy ko ninyo nga mopalit og motor, ang uban gibayran gyud og cash, apan duha ka buwan na lang dili pa magamit ang motor kay wa pa marehistro.

Una ninyong himoon, pangutan-a ang dealer kon pila ka buwan usa nila marehistro ang motor. Balikon nako, dali ra gyud kaayo ang pagrehistro. Aw ibutang lang nato, usa ka semana.

Nganong dugay man ang pagrehistro sa ubang dealers? Kay ang mga papeles sa motor nga para irehistro, adto pa man nila ipadala sa head office nila nga tua sa Zamboanga, ug tua sa lugar nga laing rehiyon.

Pangutan-a kon asa nila irehistro ang motor nga inyong paliton, ug kon dili gani dinhi sa LTO Cebu/Region 7 nila irehistro, ayaw diha pagpalit.

Pangita og motorcycle dealer nga moparehistro sa motor dinhi ra sa Cebu, unya kinahanglang mopasalig sila nga ilang dalion ang pag-rehistro.

Ang tinuod, madugay ang pagrehistro kay huwaton man nila nga modaghan ang transaksyon aron dunganon nila pagduso ngadto sa LTO.

Kon adto nila sa LTO sa ubang rehiyon iparehistro, mao na nga maabtan og tulo ka buwan usa nila maparehistro ang mga motor.

Gikan dinhi sa Cebu, huwaton nila nga daghan usa sila og mabaligya ug ipadala pananglit sa Zamboanga (Region 12), dayon gikan sa ilang main office malangan na sab pagduso sa LTO, didto sa LTO maabtan na sab og usa ka semana, dayon inigkuha nila, madugay pa gyud ang pagpadala dinhi sa Cebu.

Balikon nako, ayaw mo pagpalit kon ingnon mo nga adto nila irehistro sa ubang rehiyon. Kinahanglang Central Visayas kay aron sayon ra ang pag-verify sa rekord sa sakyanan.

Kon tua sa ubang rehiyon marehistro, sus, lisura kon mopaloap ka sa mga dukomento sa imong motor. Ingon usab niini ang himoa bisan sa mga sakyanan, ayaw gyud pagsugot nga adto irehistro sa ubang LTO branches nga dili Region 7.

Sa laktud, yam-iran nato kining mga dealers ug sakyanan nga pwerteng dugaya makaparehistro sa ilang mga gibaligya nga motor ug ubang sakyanan.