Ikaduha ka pulong

Padayon mang gipanggukod sa Kongreso ug Senado ni Presidente Bongbong Marcos (PBBM) kadtong mga good governance leaders, vloggers ug citizens, kinsa igo rang misulti-padayag sa unsay tinuoray'ng gibuhat ning maong administrasiyon base sa aktuwal nilang nasinati, nagpadayon usab ang patas-anay sa presyo sa tanang palaliton.

Gusto man diay ang administrasiyong Marcos nga daygon, unta mga langitnong pagpangalagad maoy ilang gipaambit sa katilingban. Unta, tanang ilegal gisumpo.  Unta atong National Security, diin nahimong kabahin tanang ahensiya sa gobiyerno, maoy ilang gilimpiyohan, gipalig-on ug seryosong gitutokan.

Kay kinsa bang nasora ang mobubo’g big investment dinhi sa ato kon ang situwasiyon sa Pilipinas, gubot pa sa lukot? Wala gyoy maayong relasyon sa presidente ug sa gidaugdaog nga katawhan? Kay samtang ang pangulo, sige lag lupad ngadto, biyahe diri, ang katawhan naghimo pod og mga rally, nagpaninggit: “Hustisya! Hustisya! Marcos, resign!”

Sa pagpamunoan ni PBBM, wala pa makatilaw’g lami ang labing ubos ug ang middle class gikan sa sinserong pag-amuma sa usa ka matinud-anong amahan sa nasud. Pag-appoint pa lang niya ni Justice Secretary Crispin ‘Boying’ Remulla, didto magsugod ang dakong kalbariyo sa katawhan. Siya maoy nagpauso sa trial by publicity.

Pero pinangga gihapon si Boying sa Ginoo. Gikuhit Niya kini pinaagi sa paghatag og sakit sa kasingkasing. Si Boying na-bypass-heart surgery aron hatagag chance sa Kahitas-an sa pagbag-o. Ug nagbag-o ba siya?

Nahisama ba siya niadtong usa sa duha ka banggiitang kawatan nga gilansang sab sa krus tupad ni Hesus, kinsa sa ngilit sa kamatayon, hingpit naghinulsul sa tanan niyang sala ug mihangyo-nangaliyupo: “Ginoo, hinumdomi ako kon Ikaw atua na sa paraiso.”? Diin, sa ikaduha ka Pulong sa Kataposang Pito, si Hesus mahinangpong mitubag: “Karon, karon dayon, mahiuban ka Kanako sa paraiso!”

Pagkaanindot nga kamatuorang nahisulat sa Balaang Kasulatan. Dinhi gimatuod sa Ginoo, nga kutob ni kinsang makasasalaa nga tiunay'ng mangayo Niyag pasaylo, dili kay Iya rang pasayloon. Ikuyog pa gyod Niya sa langit.

Ang hingpit pagbag-o ug pagbalik ni Boying sa Ginoo, usa sa makasulbad ning dakong suliran nga giantos sa katawhan. Apam kon magpabilin siya sa unsay iyang naandan, kining maong suliran manganak pag laing daghan. Unta, pilion ni Boying ang hukom nga kaniya makapaha-Langit!